Ardian Gjini është zgjedhur kryetar i ri i Aleancës për Ardhmërinë e Kosovës, në Kuvendin Zgjedhor të kësaj partie të mbajtur sot.
Eksperti nga Mitrovica Arben Dashevci, ka vlerësuar zgjedhjen e Gjinit në krye të AAK, duke e cilësuar si një figurë me vlera të mëdha kombëtare dhe me përvojë të gjatë në menaxhim institucional.
Për Bold News, Dashevci u shpreh se Gjini ka dëshmuar aftësi si ministër dhe gjatë dy mandateve në drejtimin e qytetit të Gjakovës, ndërsa shtoi se ai pritet të ketë sukses edhe në detyrën e re politike.
“Ardian Gjini njihet si person me vlera të mëdha kombëtare, por njihet edhe si profesionist në menaxhim si ministër dhe tash dy mandate në qytetin e Gjakovës. Mendoj që do të jetë zëvendës i mirë me sukses të plotë në rrugëtimin e tij të ri si kryetar i AAK-së”, deklaroi Dashevci.
Gjini, i cili është edhe kandidat për kryeministër nga AAK-ja, tha para delegatëve se partia nuk po nis nga zero, por mbi një bazë të fortë besimi dhe bashkëpunimi të ndërtuar ndër vite.
“Vëllezër e motra, unë besoj fort se gjithçka për të cilën po flasim sot është e arritshme. Nuk jemi duke u nisur prej tokës, por prej një ndërtese të jashtëzakonshme që e kemi ndërtuar së bashku me ju, kryetar.
Po nisemi prej besimit që e kemi për Kosovën, prej bindjeve që i kemi ndërtuar me qindra e mijëra njerëz në Kosovë.
Nuk jemi duke u nisur prej zeros dhe kjo na jep forcë: ne mundemi, Aleanca mundet, Kosova mundet. Kosova ka njerëz, Aleanca ka njerëz”, tha ai.
Ramush Haradinaj ka dhënë dorëheqje nga udhëheqja e AAK-së në shkurt të këtij viti.
