Vendimi i Edi Ramës për të mos hequr mandatin e Belinda Ballukut ka krijuar një precedent të pazakontë në politikën shqiptare: një zyrtare e lartë e qeverisë e akuzuar nga SPAK për korrupsion vijon të mbajë mandat parlamentar dhe të ketë mbrojtje politike, duke rrezikuar besueshmërinë e institucioneve dhe procesin e integrimit europian.
Ndërkohë kryeministri Rama në një intervistë të fundit për median estoneze Postimees, tha se për rastin e Belinda Ballukut kanë bërë gjënë e duhur që nuk i hoqën imunitetin.
Ai u shpreh se Prokuroria nuk e akuzon për korrupsion, por për keqmenaxhim të Prokurimeve Publike.
“Pretendimet janë të pasakta, por kështu funksionon sot informacioni publik. Sepse, së pari, nuk është rast korrupsioni. Prokurori nuk e akuzon atë për korrupsion. Pra nuk ka akuzë për korrupsion. Bëhet fjalë për keqmenaxhim të prokurimeve publike, që sipas Kodit Penal është shumë larg korrupsionit.
Së dyti, në Shqipëri nuk kemi imunitet ndaj hetimit. Pra, kushdo mund të hetohet. Edhe unë vetë mund të hetohem nga prokurori pa e ditur fare. E vetmja gjë që bën parlamenti është të thotë “po” ose “jo” për kufizimin e lirisë së dikujt. Ne nuk menduam, dhe vazhdoj të mos mendoj, se kjo duhej bërë. Jam gjithnjë e më i bindur se bëmë gjënë e duhur kur thamë: vazhdoni hetimin, por nuk mund t’ia kufizoni lirinë dikujt vetëm mbi bazën e dyshimeve për diçka që nuk është korrupsion”, tha Rama.
