Irani është në gjendje t’i rezistojë bllokadës detare të Shteteve të Bashkuara për të paktën tre deri në katër muaj dhe ka ruajtur rreth 70% të arsenalit të tij të raketave, pa llogaritur dronët që janë shumë më të lehtë për t’u prodhuar dhe efektivë për paralizimin e Ngushticës së Hormuzit.
Sipas një raporti të CIA-s të zbuluar nga “Washington Post”, nëse këto vlerësime janë të sakta, Donald Trump rrezikon të mbetet i përfshirë në luftë deri në prag të zgjedhjeve të mesmandatit në nëntor. Kjo do të shpjegonte edhe nxitimin e tij për të arritur një marrëveshje që t’i japë fund konfliktit, mes kërcënimeve dhe hapjeve të njëpasnjëshme për negociata.
Sipas dokumentit të inteligjencës amerikane, optimizmi publik i Shtëpisë së Bardhë për një dorëzim të afërt të Teheranit nuk është i justifikuar.
Së pari, industria energjetike iraniane nuk është në prag kolapsi, por mund të përballojë presionin për të paktën tre deri në katër muaj ose më shumë. Nxjerrja e naftës është ngadalësuar, por jo ndalur, për të shmangur dëmtimin e puseve, ndërsa nafta transportohet si zakonisht në depo dhe në anije. Irani po përdor gjithashtu rrugë tokësore me autocisterna dhe trena për të kompensuar humbjet, duke reduktuar dëmin ekonomik dhe duke vazhduar të sigurojë të ardhura.
Sipas CIA-s, bllokada detare do të duhej të zgjasë edhe disa muaj për të shkaktuar presion real që mund të dobësojë regjimin. Por ndërkohë, aleatët e rajonit po shprehin pakënaqësi, ndërsa sipas disa raportimeve, Arabia Saudite ka kundërshtuar operacionin amerikan “Project Freedom”.
Një bllokadë e zgjatur mund të rrisë çmimet e naftës dhe benzinës dhe të ndikojë inflacionin, duke sjellë pasoja ekonomike edhe për SHBA-të në prag të zgjedhjeve. Sondazhet tregojnë vështirësi për Trump-in dhe republikanët, ndërsa një konflikt i zgjatur mund të ketë pasoja serioze politike.
Problemi i dytë është se Irani po ruan ende kapacitete të konsiderueshme ushtarake. Para operacionit “Epic Fury”, Teherani kishte rreth 2 mijë e 500 raketa balistike dhe mijëra dronë. CIA vlerëson se Irani ka ruajtur 70% të raketave dhe 75% të pajisjeve të lëshimit, ka riparuar disa sisteme të dëmtuara dhe ka rifilluar prodhimin në disa struktura nëntokësore.
Dronët, më të lehtë për t’u prodhuar, po përdoren si armë kyçe në luftën asimetrike, pasi edhe një sulm i vetëm ndaj një anijeje mund të paralizojë transportin detar në Hormuz.
Sipas raportit, dëmet e shkaktuara nga Irani janë më të mëdha se sa pranohet zyrtarisht, me 228 objektiva amerikane të goditura, ndërsa rreth 400 kilogramë uranium i pasuruar mbeten ende në duart e Teheranit.
Zëdhënësja e Shtëpisë së Bardhë, Anna Kelly, i ka hedhur poshtë këto pretendime, duke deklaruar se gjatë operacionit “Epic Fury” Irani është goditur rëndë ushtarakisht dhe tani po “mbytet ekonomikisht”, duke humbur rreth 500 milionë dollarë në ditë për shkak të bllokadës së porteve.
Sipas saj, presidenti Trump ka në dorë të gjitha kartat, ndërsa negociatat po vazhdojnë për një marrëveshje përfundimtare./La Repubblica
