Emisioni “Stop”, në TV Klan paraqiti sot, më 7 maj edhe rastin e ndërtuesit Sabri Shera, administrator i shoqërisë “AA Konstruksion”, ndaj të cilit “Stop” ka transmetuar edhe më parë denoncime për mashtrim.
Në vitin 2015, ai i bëri ofertë qytetarit Shpëtim Mëniku se, në këmbim të vendit ku kishte shtëpinë, do të ndërtonte pallat dhe, kur të përfundonte objekti, Mëniku, si pronar i truallit, do të pajisej me një apartament në katin e tretë, 55 m2.
Palët lidhën kontratë dhurimi në vitin 2015, ku ndërtuesi ishte në cilësinë e dhuruesit, kur ende nuk e gëzonte objektin.
E korrigjoi në vitin 2019, kur lidhi kontratë shkëmbimi, ku pasi të mbaronte objekti, qytetari Mëniku do të merrte me çelësa në dorë apartamentin e premtuar.
Por ndërtuesi, jo vetëm që nuk iu përmbajt kësaj kontrate, por e kishte shitur disa herë apartamentin. Përpara kamerës së “Stop” ai nuk pranoi të jepte një deklaratë.
“Mos më hajde nga mbrapa tani o burrë, offf.”
Lidhur me këto denoncime, Gjykata e Shkallës së Parë e dënoi Sherën me 6 vjet burg si fillim, pastaj dënimi u reduktua në 3 vjet, por në fund u katandis në 3 vjet shërbim prove.
Arben Llangozi, avokat i qytetarëve, shprehet se ky dënim është qesharak, pasi vepra penale e tij është në rrethana rënduese.
“Kemi favorizim të pastër nga drejtësia shqiptare që i bëhet këtij elementi të botës së krimit, për arsye sepse ky shtetas më shumë sesa një herë ka mashtruar qytetarë të ndryshëm. Pra, kemi një pallat të tërë që i është shitur disa personave dhe ka futur shoqërinë në kolaps. Nuk është rast që duhet të trajtohet me rrethana lehtësuese, por me rrethana tepër rënduese, gjë që nuk është trajtuar kështu nga drejtësia shqiptare.”
/Emisioni STOP
