Ish deputeti, Petrit Vasili, ka reaguar në lidhje me vendimin e Gjykatës së Lartë, e cila liroi nga arresti shtëpiak, ish-drejtoreshën e AKSHI-t, Mirlinda Karçanaj.
Në një postim në rrjete sociale, Vasili shkruan se Gjykata e Lartë është sipas tij e shitur totalisht te pushteti.
Edhe pse akuzat ndaj Karçanajt janë shumë të rënda, sërish gjykata ka vendosur ta lirojë, një praktikë që sipas Vasilit, nuk është zbatuar njësoj me Ilir Metën.
Vasili ka ngritur më tej akuza se Gjykata e Lartë është, sipas tij, një zorrë qorre e qeverisë, ndërsa i ka bërë thirrje SPAK-ut të nisë hetimet.
Reagimi i plotë i Vasilit:
Karçanaj, akuzë për miliona euro, lehtësohet, Meta akuzohet për përralla dhe izolohet në burg.
Gjykata e Lartë mban qëndrime tamam si gjykatë e shitur totalisht te pushteti.
Lehtëson masën e sigurisë të Karçanajt, vetëm dy herë në muaj me detyrim paraqitjeje, megjithëse akuzat janë shumë të rënda dhe përgjimet e dokumentet janë kaq diskredituese.
E lehtësuan Karçanajn, aferim Gjykata e Lartë.
Po për Ilir Metën, që akuzohet për përralla pa asnjë provë, fakt, shkresë apo dokument dhe pa asnjë gram përfshirjeje në asnjë tender apo fond publik, përse refuzuan lehtësimin e masës së sigurisë?
Pra Gjykata e Lartë në mënyrë të pacipë mban dy qëndrime krejt të kundërta: e butë, e dashur dhe e ëmbël me pushtetin e korruptuar me qindra milionë euro, dhe nga ana tjetër sillet egërsisht ndaj opozitës, ndonëse nuk ka asnjë provë e fakt ndaj saj.
Pushteti urdhëron siç do vetë Gjykatën e Lartë dhe e ka kthyer në një zorrë qorre të qeverisë.
🚩 Kur Edi Rama dha urdhër, Gjykata e Lartë filloi shqyrtimin e standardeve të paraburgimit sepse po dilnin në shesh mjaft “efendilerë” të pushtetit të korruptuar.
🚩 Kryetari Sadushi, në funksion të puçit të rrëmbimit të mandateve të Gjykatës Kushtetuese si kryetar i KED sipas Prokurorisë së Përgjithshme.
Këshilli i Emërimeve në Drejtësi nuk ka kryer verifikim të plotë për dekriminalizimin e të paktën 12 kandidatëve për në Gjykatën Kushtetuese gjatë vitit 2025.
🚩 Kryetari Sadushi, në shkelje flagrante të Kushtetutës, hapi vakancën për anëtar të Gjykatës Kushtetuese duke mos e pasur këtë të drejtë, të cilën e ka me ligj vetëm Gjykata Kushtetuese vetë.
🚩 Gjykata e Lartë manipuloi votimet për anëtar të Gjykatës Kushtetuese, manipulime të denoncuara zyrtarisht dhe publikisht nga kandidatët në garë.
Kjo gjykatë nuk meriton gjëkundi emrin Gjykatë e Lartë, por i shkon emri Gjykatë e Ulët e mizerabilitetit të lartë.
SPAK, boll u fshehët. Koha që kjo gjykatë të përgjigjet penalisht ka ardhur dhe ka kaluar.
