Policia ka arrestuar dy persona dhe ka shpallur një tjetër në kërkim lidhur me skandalin e helmimit të studentëve në Akademinë e Sigurisë.
Raportohet se në pranga kanë rënë teknologu dhe kuzhinieri i kompanisë së kateringut “Sori-AL”, me administratore Alma Tafanin, që furnizonte studentët me ushqim në tre vakte gjatë ditës.
Ndërkohë, administratorja e kompanisë Alma Tafani është shpallur në kërkim nga policia.
Studentët e prekur nga helmimi kanë shfaqur simptoma të rënda, si të vjella dhe dhimbje të forta barku. Pas paraqitjes në spital, ata kanë marrë trajtim mjekësor, serume dhe më pas janë larguar.
Hetimet vijojnë për të përcaktuar përgjegjësitë e plota dhe për të zbuluar shkakun konkret të helmimit masiv që preku dhjetëra studentë të Akademisë së Sigurisë.
