Analisti Andi Bushati, ka komentuar zhvillimet politike në Kosovë, duke theksuar rëndësinë e narrativave në zgjedhje.
I ftuar në emisionin ‘Çim Peka Live’ në SYRI TV, ai u ndal te përplasjet mes figurave politike si Albin Kurti, Lumir Abdixhiku dhe Vjosa Osmani, duke vlerësuar se vetëm Vetëvendosja hyn në garë me një mesazh të qartë dhe të strukturuar për elektoratin.
Bushati: Përveç pak a shumë kësaj që u tha, llogarive numerike, politika dhe sidomos zgjedhjet kanë dhe një garë narrativash. Albin Kurti është njeri që ndan. Ti mund të biesh apo mos biesh dakord me narrativën e atij. Por, unë shumë herë kam rënë dakord, për herën e fundit s’kam rënë dakord, nuk ka rëndësi. Por është bindës ose jo bindës për njerëzit ose që i shkojnë mbrapa ose e kritikojnë. Kurse bashkimi Lumir me Vjosën si opozitarë të Albinit, nuk ka ndërthurje narrative.
Po të shikoje intervistën që dha Vjosa te ty, Çim, Vjosa gati ankohej që, unë ç’nuk bëra për ta mbështetur këtë Albinin, po ky nuk ma diti dhe më flaku tej. Ndërkohë që narrativa e Lumirit është narrativa që Albini e rrezikon Kosovën si një njeri që na prish me ndërkombëtarët e që rrezikon demokracinë. Këto dy rrëfime bashkë nuk mund të shkojnë në zgjedhje. Ose Vjosa do shkonte te Lumiri, ose Lumiri do shkonte te Vjosa dhe dikush duhet të pranonte. Pra, në kuptimin se si futet njëra palë dhe tjetra në zgjedhje, Vetëvendosja ka prioritet. Deri ku mund të shkojë ky prioritet, unë besoj, po unë e kam besuar dhe herën e kaluar dhe rezultova gabim, që për mënyrën si e menaxhoi këtë krizë dhe për mënyrën si u soll me Vjosën, Albin Kurti dhe Vetëvendosja do paguajnë një çmim.
Por gjithsesi, është e vetmja parti që ka një rrëfim për t’i treguar elektoratit në këto zgjedhje. Pjesa tjetër janë pak a shumë, janë kaotikë, nuk dinë të zgjedhin këtej apo të zgjedhin këtej. Nuk i hyra në meritë, ka të drejtë apo s’ka të drejtë. Thjesht po them, rrëfimi i Albinit dhe i Vetëvendosjes është, unë kam një opsion timin për Kosovën.
