Aktivisti dhe gazetari Endri Tafani ka komentuar zhvillimet me të fundit të konflikteve në Lindjen e Mesme.
I ftuar në podcastin (Per) Shtjellim” me Ilir Kalemajn, Tafani u ndal te tensionet mes Izraelit dhe Iranit, duke paralajmëruar se si pasojë e bombardimeve, Iranit mund t’i shpërthejnë puset e naftës, ç’ka do të sillte pasoja të mëdha ekonomike dhe energjetike.
Ai theksoi gjithashtu rëndësinë e petrodollarit në ekonominë globale, duke u shprehur se rënia e tij do të kishte pasoja të rënda për Shtetet e Bashkuara, megjithatë sipas tij, ky sistem mbetet rezistent edhe për 50 deri në 100 vitet e ardhshme.
Në analizën e tij, Tafani e cilësoi konfliktin izraelito-palestinez si një përplasje me bazë fetare dhe për rrjedhojë të vështirë për t’u zgjidhur. Ai shtoi se Irani ka tentuar të legjitimohet në arenën ndërkombëtare përmes mbështetjes së çështjes palestineze.
Duke iu referuar historisë, Tafani deklaroi se Irani ka qenë shpesh objekt pushtimesh nga fuqi të ndryshme, ndërsa përmendi edhe rolin e aktorëve të jashtëm në rajon, duke pretenduar se shërbime si KGB kanë pasur ndikim në organizata të caktuara palestineze në të kaluarën.
Sipas tij, një përshkallëzim i konfliktit në Iran do të kishte pasoja të mëdha globale, ku ndër më të prekurat do të ishin Kina dhe Europa, për shkak të varësisë nga energjia dhe tregjet ndërkombëtare.
Intervistën e plotë mund ta ndiqni në linkun më poshtë:
