Inteligjenca Artificiale është bërë pjesë e pandashme e jetës së përditshme. Nga pyetjet më të thjeshta deri te këshillat personale apo financiare, miliona njerëz i drejtohen çdo ditë platformave si OpenAI ChatGPT dhe shërbimeve të ngjashme.
Rritja e përdorimit tregon qartë se kjo teknologji ka hyrë në rutinën tonë, por ekspertët paralajmërojnë se pas komoditetit fshihen edhe rreziqe reale, sidomos kur bëhet fjalë për privatësinë dhe të dhënat personale.
Rreziku që shumë njerëz e nënvlerësojnë!
Sipas raportimeve ndërkombëtare, një pjesë e madhe e përdoruesve kanë futur në chatbot-e informacione sensitive, përfshirë të dhëna financiare apo mjekësore. Në të njëjtën kohë, shumica shprehen të shqetësuar për sigurinë e tyre.
Ekspertët theksojnë se shumë platforma përdorin ndërveprimet për të përmirësuar modelet e tyre, çka do të thotë se informacioni i ndarë mund të ruhet ose analizohet sipas politikave të secilit shërbim.
5 gjërat që nuk duhet t’i ndani kurrë me AI
-Të dhënat identifikuese personale: emër i plotë, adresë, numër identiteti, pasaportë.
-Informacioni i punës: emri i kompanisë, detaje konfidenciale, projekte të brendshme.
-Borxhe apo detaje bankare: kredi, numra llogarish, karta bankare.
-Shpenzime të detajuara: zakone blerjesh apo pagesa mujore.
-Dokumente personale: deklarata tatimore, kontrata, dokumente zyrtare.
Pse njerëzit vazhdojnë t’i tregojnë sekretet?
Studiuesit e quajnë këtë “paradoksi i privatësisë”. Edhe pse njerëzit e dinë rrezikun, ata vazhdojnë të ndajnë informacione sepse chatbot-et krijojnë ndjesinë e një bisede njerëzore dhe rrisin ndjenjën e besimit.
