Një shtetas i identifikuar si Erald Vogli është arrestuar nga policia në Durrës, pasi u kap duke tentuar të fusë lëndë të dyshuara narkotike në ambientet e burgut.
Sipas njoftimit zyrtar, ngjarja ka ndodhur më 27 prill 2026, rreth orës 12:50, në Institucionin e Ekzekutimit të Vendimeve Penale në Durrës. Gjatë kontrollit fizik të ushtruar ndaj familjarëve që hynin për takime, autoritetet konstatuan tentativën për futjen e sendeve të ndaluara.
Sipas policisë, shtetasi Erald Vogli kishte shkuar për të takuar vëllain e tij, të paraburgosurin Ergys Vogli. Gjatë kontrollit, atij iu gjetën dy qese të vogla të mbështjella me natriban, të cilat dyshohet se përmbanin lëndë narkotike dhe ishin fshehur në trup.
Pas konstatimit, sendet u sekuestruan dhe u bë arrestimi i shtetasit, ndërsa u njoftua edhe Shërbimi i Kontrollit të Brendshëm të Burgjeve për vijimin e veprimeve procedurale.
Hetimet vijojnë për zbardhjen e plotë të rrethanave të rastit dhe përcaktimin e përgjegjësive ligjore.
