Samiti i Diasporës ishte i ngjashëm me një kuvend elektoral të Partisë Socialiste dhe me qëllime propagande brenda dhe jashtë vendit nga kryeministri Edi Rama pas vështirësive ku ndodhet aktualisht pasi integrimi i vendit është bllokuar nga Bashkimi Evropian për shkak të mosheqjes së imunitetit të Belinda Ballukut dhe skandalet e shumta qeveritare.
Kështu u shpreh sot deputetja demokrate Ina Zhupa, duke denoncuar organizimin e eventit të rëndësishëm si një aktivitet politik, më shumë sesa strategjik dhe kombëtar.
Ligjvënësja opozitare u shpreh se “Samiti ishte si të thuash më ka çu nëna me la gojën”.
“Kur e panë se salla mbeti bosh, ftuan 140 deputetët e Kuvendit për ta mbushur. Edhe ministri na tha se sa i bukur ishte samiti, ndërkohë që nuk na u tha se cilat ishin arritjet e tre Samiteve të mëparshme. Dhe ju them se janë zhbërë disa vendime nga samitet e mëparshme, si ai për fondet ndaj tyre, duke i lënë pa fonde institucionet që lidheshin me diasporën, ose qendrat kulturore, shpërndarja e abetares shqip psh. Diaspora dhe përfaqësuesit e saj u sollën në Samit si dëgjues dhe jo për t’u dëgjuar. Mazhoranca socialiste ndodhet në vështirësi, u janë mbyllur dyert e Evropës dhe integrimi është bllokuar për shkak se nuk u votua heqja e imunitetit të Belinda Ballukut. Kudo ka skandale të qeverisë që janë njoftuar edhe në BE, ka bllokim të procesit të integrimit nga shtetet evropiane aktualisht, kemi parasysh edhe reagimin e fundit të BE-së për ligjin klientelist të porteve turistike”, tha Zhupa.
Ajo shpjegoi edhe qëllimin e organizimit të Samitit të Katërt të Opozitës, duke theksuar se Taulant Balla ndodhej aty pa asnjë funksion shtetëror, por partiak.
“Ndaj edhe Ramës i duhej një event propagandistik i madh për të shuar këtë zhurmë. Për çfarë duhej Taulant Balla aty në atë event, çfarë delegimi kishte, pra ishte dërguar nga PS e jo nga shteti, ai nuk ishte eventi i Partisë Socialiste. Ai nuk ka funksion shtetëror aty, pra ishte në funksion të mandatit partiak që ka e jo shtetëror. Samiti ishte një event dhe Kuvend elektoral i PS-së. Samiti nuk është hajde dhe fol, ai ishte organizuar si një mision partiak dhe Rama e përdori për propagandë të brendshme dhe të jashtme si arritje imagjinare. Samiti ishte i organizuar në formë partiake për propagandë, për oligarkët, ligjet klienteliste si ai i porteve turistike, investitorëve strategjikë, që do japi edhe portet tani si ai i Durrësit dhe të tjera”, argumentoi deputetja.
Ajo shtoi se Samiti duhet t’i përkiste Diasporës dhe denoncoi se institucionet që mbulojnë këtë diasporë kanë mbetur pa fonde.
“Samiti duhet të ishte për Diasporën e vërtetë, për ta që duan të vijnë të investojnë. Ka shumë gjëra që mund të bëhen për diasporën, kryesorja është ruajtja e identitetit, të përdoren elementët më të mirë të saj si ambasadorë të diasporës në vendet ku janë”, tha Zhupa./ News24
