Zëvendëspresidenti i Shteteve të Bashkuara, JD Vance, deklaroi se bisedimet historike për paqe me Iranin kanë përfunduar pa arritur një marrëveshje, pavarësisht përpjekjeve intensive që zgjatën mbi 21 orë, raporton BBC.
Vance theksoi se Uashingtoni kishte bërë të qarta “vijat e kuqe”, por pala iraniane nuk pranoi kushtet e propozuara.
“Nuk arritëm në një pikë ku Irani të pranonte termat tanë. Lajmi i keq është se nuk kemi një marrëveshje”, u shpreh ai.
Ai shtoi se delegacioni amerikan, i përbërë nga këshilltari i Shtëpisë së Bardhë Jared Kushner dhe i dërguari special për Lindjen e Mesme Steve Witkoff, do të largohet nga Pakistani, ku u zhvilluan negociatat.
Megjithatë, Vance vlerësoi rolin e autoriteteve pakistaneze në organizimin e bisedimeve. Ai falënderoi kryeministrin e Pakistanit dhe shefin e ushtrisë, Asim Munir, duke theksuar se “çdo mangësi në negociata nuk ishte për shkak të palës pakistaneze, e cila bëri një punë të shkëlqyer”.
Bisedimet konsideroheshin një përpjekje e rëndësishme diplomatike për të ulur tensionet mes SHBA-së dhe Iranit, ndërsa dështimi për të arritur një marrëveshje pritet të ketë pasoja në zhvillimet e mëtejshme në rajon.
