Prokuroria e Posaçme ka kërkuar në GjKKO pushimin e çështjes për ish-kreun e KPP, Jonaid Myzyri.
Myzyri, është liruar nga çdo akuzë pasi ishte marrë i pandehur nga Prokuroria e Posaçme verën e kaluar, për një procedurë me vlerë 2.2 miliardë lekë të vjetra.
SPAK njoftoi në atë kohë se Myzyri akuzohej për veprën penale “Shkelje e barazisë së pjesëmarrësve në tendera apo ankande publike”, e kryer në bashkëpunim.
Ai u pezullua menjëherë nga detyra, ndërsa si masë shtrënguese iu caktua “detyrim paraqitjeje”.
Bëhej fjalë për një tender me vlerë 2.2 miliardë lekë të vjetra, për mirëmbajtjen rutinë të rrugës së Rrëshenit, nga Ura e Fanit deri në Urën e Repsit.
Sipas hetimeve, shqyrtimi i procedurës nga ana e autoritetit kontraktor kishte parregullsi, të cilat nuk ishin marrë në konsideratë nga Komisioni i Prokurimit Publik.
Gjatë shqyrtimit të ankesës për këtë procedurë, dyshohej se Komisioni kishte favorizuar në mënyrë të kundërligjshme bashkimin e operatorëve ekonomikë A.M. dhe D.-1., të cilët, sipas hetimeve, kishin paraqitur dokumente të falsifikuara.
Megjithatë, pas hetimeve që kanë zgjatur rreth dy vite, Prokuroria e Posaçme nuk ka arritur të sigurojë prova që implikojnë Jonaid Myzyrin dhe i është drejtuar Gjykatës së Posaçme me kërkesën për pushimin e çështjes.
Përgjimi i punonjëses që “fundosi” Jonaid Myzyrin: I shërbeva si qeni
Nnjë rol të rëndësishëm në artikulimin e akuzave nga ana e Prokurorisë së Posaçme ndaj Myzyrit ka patur edhe biseda telefonike e përgjuar e punonjëses së KPK, Lindita Skeja e cila implikon titullarin në procedurat abuzive të tenderit.
Sipas SPAK, një pjesë e këtyre komunikimeve lidhen me akuzën për të cilën dyshohet personi nën hetim, Jonaid Myzyri, kreu i Komisionit të Prokurimeve Publike i pezulluar nga detyra dhe me masë detyrim paraqitje nga GJKKO.
Në një bisedë të përgjuar, punonjësja Skeja i ankohet bashkëbiseduesit në telefon se kishte firmosur siç i ishte kërkuar nga Myzyri, ndërsa tani asaj i duhej të paraqitej për t’u marrë në pyetje.
Në një moment të bisedës ajo thotë gjithashtu se “punonjësit firmosin letrat, ndërsa lekët i marrin të tjerët”. “Vajta i shërbeva si qeni. I shërbeva me sy mbyll… e du edhe pikë. E du kshtu…firmos ne, të gjith si delet. Ime veme ku të n’a thërrasin. Rresht. Firmën ne e lekët ata”, shprehet gjatë bisedës telefonike punonjësja e KPK, Lindita Skeja.
- Përgjimi i SPAK
Speaker A (Lindita): Ai na majti kshu… që krijum besim që ne jemi miqtë e atij…ene rrimë të qetë. N’a ofroi mori informacione. Unë vajta dhe i shërbeva si qeni.
Speaker B: Hej zot!
Speaker A (Lindita): Vajta i shërbeva si qeni. I shërbeva me sy mbyll… e du edhe pikë. E du kshtu…firmos ne, të gjith si delet. Ime veme ku të n’a thërrasin. Rresht. Firmën ne e lekët ata.
Speaker B: A mos i hongert o Zot.
Speaker A (Lindita): Bojna se e dini ju se ç’ju boj unë, bojna… Më pas
Speaker A (Lindita): Amin…ata hop mrap ere… hop mrapa… hop mrapa me e çoi mu në KPP… më çoi mu në KPP, përballem atje me lloj lloj pislliku…
Speaker B: Pi hiç ere un sve po ene tha Dashi motrës tha mos shko…
Në dosjen hetimore, Prokuroria e Posaçme thekson se “nga rezultati i përgjimeve ngrihen dyshime të arsyeshme që në vendimmarrjen e KPP për shqyrtimin e ankesës me objekt: “Mirëmbajtje rutinë me performancë rruga Rrëshen (Ura e Fanit) – Shpal, Shpal-Q.Bene – Hadroj, Shpal – Ura e Repsit”, me fond limit 219.866.693 lekë pa TVSH si dhe në vendimmarrje të tjera, ekzistojnë elementë të veprimeve të kundraligjshme që mund të kenë ndikuar në këto vendime”.
