Deputeti socialist Erion Braçe ka ngritur sot në Kuvend shqetësime mbi politikat e qeverisë ndaj fermerëve, duke kritikuar ministrin e Bujqësisë, Andis Salla për heqjen e naftës falas dhe mungesën e kontrollit mbi çmimet e plehrave kimike.
Braçe theksoi se heqja e naftës falas ka ndodhur në një moment shumë të pafavorshëm, kur çmimi i saj është i lartë dhe kjo rrit drejtpërdrejt koston e prodhimit bujqësor.
Ai sugjeroi që skema e mbështetjes duhet të favorizojë prodhimin, duke subvencionuar litrat e qumështit apo kilogramët e produkteve të tjera, në vend që të penalizojë fermerët në periudha krize.
Një tjetër temë e prekur nga Braçe ishte rritja e çmimeve të plehrave kimike.
Sipas tij, justifikimi i tregtarëve se po shesin me çmimin e bursës është i pavërtetë, pasi të dhënat e Doganave tregojnë se pjesa më e madhe e plehrave është importuar para nisjes së konfliktit në Lindjen e Mesme.
Ai akuzoi se sapo shpërthyen raketat, çmimet u dyfishuan pa arsye reale.
“Pse nuk favorizoni prodhimin por favorizoni kokë lope, dele dhe dhi… po jepi mo lekë për litër dhe vendos një standard të atij qumështi që prodhohet, jepi lekë për kg prodhimi, çfarëdo prodhimi të jetë.
Ajo skemë ka këtë pjesë të mirë, por pjesën tjetër ama që keni hequr naftën që ishte falas në një moment krize… unë e kam thënë që po duhet të ndryshojë skema e naftës, por jo në një moment krize, kur çmimet janë sipër dhe nuk e dimë sesi do të shkojë, sepse rrisin drejtpërdrejtë koston”, u shpreh ai.
Një tjetër problem për të cilin e ka bërë thirrje ministrit që të marrë masa dhe të verifikojë në terren, është rritja e çmimit të plehrave kimike.
Braçe thotë se justifikimi i shitësve se po shesin me çmimin e bursës është i pavërtetë, pasi sipas tij, nga të dhënat që ka marrë në Dogana, vetëm tre tonë pleh kimikë është importuar pas nisjes së luftës, pjesa tjetër ka qenë e blerë para sulmit në lindjen e Mesme.
“E në krahun tjetër kemi plehrat kimike ministër, është abuzim shumë i madh, nga data 28 shkurt deri në 31 mars që unë kam marrë të dhënat e Doganave, kanë hyrë vetëm tre mijë tonë plehra kimikë, gjithë pjesa tjetër ka ardhur para luftës, po si mos u dyfishuan çmimet sapo plasën raketat atje.
Po mirë mo merret dikush me këtë dhe ta verifikojë? Thotë ai në Kavajë, ‘po shes me çmimin e bursës’… të kujt burse mo po shet ai? Kur mallin e ka sjellë në 2025 dhe muajt e parë të 2026? Vejini fre abuzimit, ndryshe fermerët nuk do marrin frymë”, tha Braçe.
