Gjykata Administrative e Apelit ka rrëzuar këtë të martë, kërkesën e një prej kandidatëve për postin e drejtorit të Byrosë Kombëtare të Hetimit, Gentian Ndoi, i cili ka kundërshtuar zgjedhjen në krye të këtij institucioni të Joni Ketës.
Administrativja rrëzoi kërkesën e Ndoit me 3 vota pro dhe asnjë kundër, duke e cilësuar kështu të ligjshme zgjedhjen e Ketës.
Në kërkesë, Ndoji pretendonte se posti i takonte atij, me argumentin se ai është renditur i pari me më shumë pikë në vlerësimin e bërë nga Komisioni Përzgjedhës i ngritur nga Prokuroria e Posaçme për vlerësimin e kandidaturave.
Për këtë arsye, ai kërkoi shfuqizimin e vendimit të 19 dhjetorit të vitit të kaluar, me anë të të cilit, Këshilli i Lartë i Prokurorisë emëroi Drejtuesin e BKH-së.
Megjithatë Gjykata Administrative ka rrëzuar kërkesën e Ndojit, duke argumentuar se përzgjedhja e Joni Ketës në krye të BKH-së është e ligjshme.
