Pasi deklaroi se do të garojë për Bashkinë e Tiranës, Erion Braçe vijon të jetë në qendër të vëmendjes.
Në ditën e dytë të Festivalit të Gazetarisë “Pyet”, deputeti socialist Erion Braçe u ndal te fenomeni i dezinformimit dhe problematikat që lidhen me të, duke kërkuar ndërhyrje nga shteti dhe duke kritikuar institucionet për mungesë transparence.
Duke marrë fjalën pas Aldor Ninit të “Acromax”, Braçe u shpreh: “Nëse do flisja kaq troç sa Aldori, në këtë vend do bëhej nami”.
Ai foli edhe për sigurinë juridike, duke theksuar se kushdo duhet të ndihet i mbrojtur, ndërsa shtoi se mënyra se si veprojnë ndonjëherë institucionet kthehet në abuzim të plotë.
“Një çështje që është shumë e rëndësishme, ka një gamë shumë të gjerë. Nuk është vetëm dezinformimi, brenda strategjisë kemi listuar disa aspekte të keqinformimit, apo të informimit që shkakton dëm. Duke nisur nga dezinformimi dhe keqinformimi dhe në fund fare edhe me propagandën. Për ta adresuar këto problematika, kryesisht me ndërhyrje të huaja, ndërsa brenda vendit me ndërhyrje politike”, tha ai.
Ai theksoi gjithashtu se një nga problemet kryesore mbetet mungesa e transparencës dhe reagimit nga institucionet: “Çështja e transparencës dhe çështja e përgjigjes së institucioneve qeveritare është kthyer në një problem shumë të madh. Jo vetëm për qytetarët, por edhe për vetë institucionet, Kuvendin e deputetët”.
