Një 59-vjeçar është arrestuar në flagrancë në Shijak, pasi në banesën e tij u zbuluan armë, municion luftarak dhe lëndë narkotike.
Sipas Policisë, i arrestuari, shtetasi me iniciale Sh. V., dyshohet se ushtronte aktivitet kriminal në fushën e trafikimit të armëve me qëllim shitjen e tyre në zonën e Shijakut.
Gjatë kontrollit në banesën e tij, uniformat blu sekuestruan 2 armë zjarri pistoletë me krehra me fishekë, 3 armë gjahu, sasi municioni luftarak të kalibrave të ndryshëm, pjesë armësh, si dhe 8 armë të ftohta (thika). Po ashtu, u gjetën 24 doza të dyshuara si kokainë, një peshore elektronike, 6 telefona celularë, 3 palë dylbi (njëra e përshtatshme për armë) dhe një dron.
59-vjeçari akuzohet për disa vepra penale, përfshirë “Trafikimi i armëve dhe i municionit”, “Mbajtja pa leje dhe prodhimi i armëve”, “Prodhimi dhe shitja e narkotikëve”, si dhe “Prodhimi, mbajtja apo shitja pa leje e armëve të ftohta”.
Materialet procedurale i janë referuar Prokurorisë së Durrësit për veprime të mëtejshme.
