Ambasada e SHBA në Shqipëri ka publikuar një alarm sigurie, duke paralajmëruar qytetarët amerikanë për rrezikun e mundshëm nga grupe të lidhura me Iranin. Sipas njoftimit, këto grupe mund të shënjestrojnë objekte apo individë të lidhur me SHBA-të, si dhe elementë të rezistencës iraniane të vendosur në Shqipëri.
Lidhur me këtë zhvillim ka reaguar deputeti dhe kryetari i Partisë Republikane, Fatmir Mediu, i cili kërkon që Presidenti i Republikës të thërrasë urgjentisht Këshillin e Sigurisë Kombëtare.
Mediu thekson se Shqipëria prej vitesh ka ndërprerë marrëdhëniet diplomatike me Iranin dhe është një partner i ngushtë i SHBA-ve, ndërsa në vend ndodhet edhe një nga pranitë më të mëdha të organizuara të rezistencës iraniane.
Ai kujton gjithashtu se qeveria shqiptare, me propozim të Kryeministrit Edi Rama, ka shpallur si organizatë terroriste Gardën Revolucionare Iraniane, ndërkohë që vendi është përballur edhe me sulme kibernetike ndaj institucioneve të rëndësishme.
Reagimi i plotë:
Ambasada e SHBA ka publikuar sot mbasdite vonë një alarm sigurie. Ku i bën thirje shtetasve Amerikanë të kenë kujdes se grupe të lidhura me Iranin mund të shënjestrojnë subjekte të lidhura me Shtetet e Bashkuara ose elementë të rezistencës Iraniane në Shqipëri.
Prej vitesh Shqipëria ka shkëputur marrëdhëniet diplomatike me Iranin, është partner me SHBA, ka sot prezencën më të madhe të organizuar të Rezistencës Iraniane.
Me propozimin e Ramës u shpall organizatë terroriste Garda Iraniane, po ashtu sulmet kibernetike janë rritur duke sulmuar institucione të rëndësishme. Çfarë presim të ndodh???
Përballë kësaj situate Presidenti i Republikës duhet të thërrasë urgjentisht Këshillin e Sigurisë Kombëtare i cili është zhvlerësuar dhe është inegzistent prej kohësh.
Bëni punën tuaj që ju ka caktuar Kushtetuta dhe ligji dhe për të cilën paguheni.
Këshilli i Sigurisë Kombëtare të bëj analizën e situatës, në bashkëpunim me partnerët, shërbimet inteligjente të marra masat që duhen urgjentisht, për tu organizuar dhe ruajtur nga çdo sulm i cili mund të jetë jo thjeshtë ai me raketa dhe dronë siç mendojnë dhe flasin shumë, por dhe me veprime subversive, të organizuara nga Irani, sulme në infrastrukturë kritike dhe interesa jetike të qytetarëve etj.
Shteti nuk është pushteti i Kryeministrit dhe Qeveria. por janë të gjitha Institucionet që kanë primare interesin e ruajtjes së sigurisë kombëtare dhe sigurisë së qytetarëve të cilës duhet ti shërbejë politika dhe institucionet.
Boll me deklarime sa naive dhe idioteske se Ne nuk kemi probleme se na mbron NATO. Anëtarësimi në NATO nuk do të thotë të heqësh dorë nga mbrojtja e sigurisë kombëtare dhe mos të vlerësosh kërcënimet.
