Pas vitesh luftërash të vazhdueshme në rajon, shefi i shtabit të ushtrisë izraelite paralajmëron se forcat janë në prag kolapsi.
Shefi i Shtabit të Ushtrisë së Izrael, gjeneral-lejtnant Eyal Zamir, ka dhënë një paralajmërim të fortë për kabinetin e vendit këtë javë: nëse nuk merren masa urgjente, ushtria izraelite rrezikon të arrijë në pikë kolapsi.
Sipas një raporti të Channel 13 në Izrael, Zamir u tha ministrave se po “ngre 10 flamuj të kuq”, duke kërkuar veprime të menjëhershme dhe miratimin e legjislacionit të vonuar për të lehtësuar barrën mbi një ushtri që ai e përshkroi si “të rraskapitur”.
Ushtria izraelite ka qenë e angazhuar në operacione të shumta në rajon, përfshirë luftën në Gaza, ndërhyrje në Liban dhe Siri, si dhe tensione të vazhdueshme në Bregun Perëndimor.
Zamir theksoi nevojën për një paketë ligjesh që përfshin:
rekrutimin e detyrueshëm,
detyrën rezervë,
dhe zgjatjen e shërbimit ushtarak.
Ai paralajmëroi se pa këto masa, shumë shpejt ushtria nuk do të jetë në gjendje të përmbushë as misionet rutinë dhe sistemi i rezervistëve mund të shembet.
Kryeministri Benjamin Netanyahu ka deklaruar se po shqyrtohen plane për të zgjatur shërbimin e detyrueshëm ushtarak. Megjithatë, shqetësimet për mbingarkesën e ushtrisë nuk janë të reja.
Që në vitin 2024, raportime të mediave ndërkombëtare kishin evidentuar mungesa në personel, lodhje të trupave dhe probleme me furnizimet situatë që sipas burimeve vetëm është përkeqësuar.
Që nga themelimi i saj në vitin 1948, ushtria izraelite është ndërtuar mbi një model që kombinon një ushtri të vogël aktive me një numër të madh rezervistësh civilë që mobilizohen në kohë krize.
Para nisjes së luftës në Gaza në tetor 2023, ushtria aktive kishte rreth 100 mijë trupa. Menjëherë pas kësaj, u mobilizuan rreth 300 mijë rezervistë, duke i tërhequr nga jeta civile për operacione ushtarake.
Kjo do të thotë se pjesa më e madhe e forcave në terren përbëhet nga rezervistë dhe jo ushtarë profesionistë.
Ku ndodhen aktualisht trupat?
Më 1 mars, pas nisjes së sulmeve amerikano-izraelite ndaj Iranit, Izraeli njoftoi mobilizimin e 100 mijë rezervistëve të tjerë, përveç 50 mijë që ishin tashmë në shërbim për shkak të luftës në Gaza.
Këto trupa janë shpërndarë në disa fronte:
kufiri me Libanin,
pozicionet në Siri,
Rripi i Gazës,
dhe Bregu Perëndimor.
Gjithashtu, janë mobilizuar edhe 20 mijë rezervistë për operacione kërkim-shpëtimi dhe mbështetje në forcat ajrore, detare dhe inteligjencë.
Izraeli ka dërguar gjithashtu mijëra trupa në Libanin jugor pas përshkallëzimit me Hezbollahun.
Zyrtarë të lartë ushtarakë kanë paralajmëruar se politikat në Bregun Perëndimor, përfshirë zgjerimin e vendbanimeve, po rrisin më tej presionin mbi ushtrinë, duke kërkuar më shumë burime njerëzore dhe mbështetje logjistike.
A janë të lodhur ushtarët?
Sipas shumë pjesëtarëve të ushtrisë, veçanërisht rezervistëve, përgjigjja është po.
Disa rezervistë kanë refuzuar të paraqiten në detyrë, duke përmendur vështirësitë ekonomike dhe familjare. Ata raportojnë se shumë prej tyre kanë humbur vendet e punës, përballen me probleme financiare ose kanë ndërprerë studimet për shkak të mobilizimit të gjatë.
Gjithashtu, ka pakënaqësi në rritje për përjashtimin nga shërbimi ushtarak të komunitetit ultrafetar Haredi, çka shihet si e padrejtë nga pjesa tjetër e shoqërisë.
Lideri i opozitës, Yair Lapid, ka kërkuar masa të forta ndaj atyre që shmangin shërbimin ushtarak, duke i bërë thirrje qeverisë të veprojë menjëherë.
“Paralajmërimi është dhënë. Është në duart tuaja,” ka deklaruar ai, duke theksuar se siguria e vendit nuk mund të lihet peng i interesave politike./Aljazeera
