Prokurori i SPAK, Altin Dumani thotë se caktimi i Plarent Ndrecës si avokat mbrojtës i Erion Veliajt është në kushte papajtueshmërie për shkak se ish deputeti i PS-së është marrë në pyetje nga Prokuroria gjatë hetimit për këtë dosje.
Në seancën e dytë në themel që po zhvillohet në Gjykatën e Posaçme, Dumani theksoi se ish ligjvënësi socialist është pyetur nga SPAK. Sa i përket të pandehurve Meriman Palushi dhe Ina Goxhaj, Dumani theksoi se atyre duhet t’u caktohet një avokat kryesisht.
“Do ndalem vetëm tek i pandehuri për te cilin gjykata duhet të procedojë, pasi të pandehurit e tjerë janë të pranishëm. Në lidhje me të pandehurin Erion Veliaj ka marrë dijeni për seancën dhe ka kërkuar të përfaqësohet nga avokati i tij Plarent Ndreca.
Ky avokat është pyetur në kuadër të këtij procedimi penal, dhe mund të jemi në kushtet e papajtueshmërisë të mbrojtësit, duke qenë se ai është pyetur gjatë fazës së hetimit paraprak. Sa i takon Meriman Palushit ky i pandehur ka ngelur pa mbrojtje duke qenë se avokatja e tij ka hequr dorë. Për të pandehurin Meriman Palushi duhet të caktohet një avokat kryesisht. Po ashtu edhe e pandehura Ina Goxhaj ka marrë dijeni për seancën, duhet t’i caktohet një avokat kryesisht”, theksoi Dumani.
Duke u ndalur sërish te avokati i ri i Veliajt, Plarent Ndreca, Dumani shtoi se nuk kanë asnjë problematikë për të vijuar me Ndrecën por “duhet të shmangim kushte papajtueshmërie në të ardhmen.”
“E para nuk është kërkesë, por është një rrethanë por ne nuk mund të rrimë pa e bërë prezent para gjykatës. Për ne nuk ka asnjë problematikë që të vijojnë mbrojtjen me zotin Ndreca. Ne ia lamë në çmim gjykatës por duam të shmangim kushte papajtueshmërie në të ardhmen.”, tha ai.
LEXO EDHE:
A u thirr për çështjen e Veliajt? Plarent Ndreca flet pas daljes nga SPAK
