Vetëm pak muaj më parë përfundoi investimi për rehabilitimin e infrastrukturës së brendshme rrugore në fshatrat e njësisë administrative Buçimas, mes tyre edhe në fshatin Rrëmenj.
Megjithatë, pas një kohe të shkurtër, në disa segmente të dy rrugëve që lidhin një prej lagjeve me pjesën tjetër të fshatit, kanë nisur dëmtimet, duke rrezikuar deri në izolimin e zonës.
Banorët, të shqetësuar për situatën, shprehen se rruga është ndërtuar me cilësi të dobët, ç’ka përbën rrezik serioz si për automjetet që qarkullojnë.
Sipas tyre, problematika ka nisur prej muajsh dhe vijon të përkeqësohet, ndërsa rrëshqitja e rrugës po thellohet gjithnjë e më shumë. Në disa segmente, më shumë se gjysma e trupit të rrugës është shembur, duke e bërë kalimin të vështirë dhe të pasigurt.
Investimi për sistemimin dhe rehabilitimin e rrugëve në këtë njësi administrative është realizuar nga kompania Rei sh.p.k dhe ka kushtuar rreth 800 milionë lekë, por pavarësisht kësaj, problematikat në këto rrugë janë tashmë të dukshme./syritv
