Drejtoria e Përgjithshme e Burgjeve ka reaguar pas lajmit për zbulimin e një sasie të madhe kanabisi në banesën e drejtorit të Burgut Rrogozhinë, Bilal Hasa.
Në njoftimin zyrtar thuhet se pas marrjes së informacionit, Drejtoria e Burgjeve ka ndërmarrë masa administrative për pezullimin e Hasës nga detyra deri në zbardhjen e plotë të ngjarjes nga organet kompetente.
“Drejtoria e Përgjithshme e Burgjeve është vënë në dijeni nga mediat lidhur me rastin e drejtorit të IEVP Rrogozhinë, Bilal Hasa. Në vijim të informacionit të marrë, Drejtoria e Përgjithshme ka ndërmarrë masa administrative të menjëhershme për pezullimin e tij nga detyra, deri në zbardhjen e plotë të ngjarjes nga organet kompetente”,- thuhet në reagim.
Aksioni policor u zhvillua pasditen e kësaj të enjte, 19 mars, në Peqin, ku u zbuluan rreth 4 mijë rrënjë kanabisi në një banesë, e cila dyshohet se i përket Hasës.
Pas operacionit, ai është shpallur në kërkim nga policia, pasi nuk është gjetur as në banesë dhe as në vendin e punës, ndërsa vijojnë hetimet për zbardhjen e plotë të rastit.
