Këtë të premte, fluksi i lartë i automjeteve ka paralizuar qarkullimin në drejtim të juglindjes së vendit.
Situata më problematike është regjistruar në rrethrrotullimin e Bradasheshit, ku është krijuar një radhë kilometrike makinash dhe drejtuesit po qëndrojnë për orë të tëra të bllokuar në trafik.
Festimet për Ditën e Verës, që tradicionalisht sjellin lëvizje masive drejt zonave turistike të juglindjes, kanë shtuar ndjeshëm numrin e automjeteve në qarkullim.
Megjithatë, drejtuesit e mjeteve tashmë përballen me një tjetër problematikë: hinkën e krijuar në rrethrrotullimin e Bradasheshit, e cila prej vitesh është një pikë e njohur për bllokime dhe vonesa.
Trafik i rënduar pritet të ketë edhe në aksin tjetër Elbasan–Librazhd–Përrenjas, veçanërisht në segmentet ku aktualisht po kryhen punime në rrugë.
Këto ndërhyrje, të kombinuara me fluksin e lartë, po e bëjnë qarkullimin edhe më të vështirë.
Drejtuesit e mjeteve shprehen të indinjuar për mungesën e masave parandaluese. Pavarësisht paralajmërimeve për fluksin e Ditës së Verës, autoritetet nuk kanë marrë masa shtesë për menaxhimin e trafikut, duke lënë qytetarët të përballen me kaos dhe vonesa të gjata.
