Kryetari i Partisë Demokratike, Sali Berisha, deklaroi se sistemi arsimor në Shqipëri ndodhet në një krizë të thellë, duke e cilësuar situatën si një rrokullisje të madhe të këtij sektori.
Gjatë një takimi me mësues dhe pedagogë me rastin e 7 Marsit, Berisha u shpreh se arsimi është përballur me politika që i cilësoi si të dëmshme për zhvillimin e tij, ndërsa kritikoi vendimin për bllokimin e doktoraturave në universitete, duke e konsideruar atë një veprim që dëmton kërkimin shkencor dhe zhvillimin akademik.
Berisha theksoi më tej rënien e Shqipërisë në testimin ndërkombëtar PISA, duke e cilësuar atë si një tregues të përkeqësimit të nivelit të arsimit në vend.
“Misioni, misioni juaj është i një rëndësie përcaktuese më shumë se çdo mision tjetër për të ardhmen e një kombi. Ne vijmë sot në këtë ditë në kushtet e një krize të jashtëzakonshme të sistemit arsimor, të një rrokullisje të këtij sistemi shumë më të madhe se ajo që shohim në rrugë dhe urat e ndërtuara nga kjo qeveri. Ju bëtë diskutime shumë të përgjegjshme dhe u falenderoj shumë për ekspozetë që bëtë, por në rast se përpiqemi të kuptojmë shkaqet e kësaj gjendje katastrofale në arsim ato janë të mirëfillta antikombëtare. Dhe është naivitet në qoftë se ne nuk i vlerësojmë të tilla.
Nuk mund të ketë akt më antikombëtar se sa të bllokosh me një urdhër doktoraturat në universitete.
Do t’u them këtu, 46 vite më parë, jo doktoraturat e kolegëve të mi, por doktoratura të studentëve të mi, sepse në atë kohë studentët kishin të drejtë ose të jepnin provimin e shtetit, ose të mbronin një tezë, pra tezat e studentëve të mi unë i kam paraqitur në kongreset më prestigjioze ndërkombëtare, sepse ato të atilla ishin.
Nuk ka rënie më të madhe ky komb se sa rënia që pësoi në PISA, 69 pozicione. Kur ndodhi kjo? Sapo nga 9 vite, këtyre u përkisnin 8 vite. Sepse PISA merr 8 vite. Zbritja katastrofale. Nuk na shërben për gjë e shkuara, por për diçka po. Na shërben si një bazë për të ndërmarrë veprime për të ardhmen”,- ka deklaruar Berisha.
