Është shtyrë seanca e parashikuar për këtë të enjte në Gjykatën e Posaçme Kundër Korrupsionit, ndaj Ilir Metës dhe të pandehurve të tjerë në dosje.
Shkak për shtyrjen u bë mungesa e avokatëve të Pirro Xhixhos, ndërsa seanca e radhës është caktuar për në datën 12 mars.
I pranishëm në seancë këtë të enjte ka qenë Ilir Meta, ndërsa SPAK u përfaqësua nga Altin Dumani.
Meta akuzohet për korrupsion pasiv të funksionarëve të lartë shtetërorë ose të zgjedhurve vendorë, pastrim parash e mosdeklarim pasurie.
Ish-bashkëshortja e tij Monika Kryemadhi akuzohet për korrupsion pasiv të funksionarëve të lartë shtetërorë në 2 raste, pastrim parash dhe mosdeklarim pasurie.
Pirro Xhixho akuzohet gjithashtu për korrupsion pasiv të funksionarëve të lartë të kryer në bashkëpunim.
Kurse mamaja e Monika Kryemadhit, Fatime Kryemadhi akuzohet për pastrim parash, së bashku me Ema Çokun.
