Policia ka publikuar pamje të grabitjes së ndodhur sot në Tiranën në një dyqan shkëmbimi valutor, brenda ambientet e qendrës tregtare “Concord”.
Në video shihet skena e grabitjes, por edhe sjellja amatore e të dyshuarit Luan Maci, i cili pasi kërcënon me armë pistoletë punonjëset e pikës, nis të mbledhë paratë me dorë dhe lë armën në banakun e biznesit. Një pjesë e madhe e tyre i bien në dysheme dhe ai ulet që t’i mbledhë për t’i futur në çantën marsup.
Policia njofton se Maci arriti të merrte të paktën 3 mln lekë në dyqanin e këmbimit valutor në rrugën “5 Maji”.
“Shërbimet e Komisariatit të Policisë Nr. 4, menjëherë pas marrjes së njoftimit për një rast vjedhjeje, në rrugën “5 Maji”, kanë organizuar në drejtimin e Prokurorisë, punën për identifikimin dhe kapjen e autorit.
Si rezultat i veprimeve të shpejta hetimore dhe operacionale nga shërbimet e Komisariatit të Policisë Nr. 4, u bë identifikimi, kapja dhe arrestimi i shtetasit:
-L. M., 42 vjeç, banues në Tiranë.
Ky shtetas dyshohet se duke kanosur punonjësen, me arme zjarri pistoletë, ka vjedhur rreth 3 milionë lekë, në një dyqan këmbimi valutor, brenda një qendre tregtare, në rrugën “5 Maji”.”– njofton policia.
Materialet i kaluan Prokurorisë, për veprime të mëtejshme.
