Në Vlorë, qytetarja Merjeme Shabani ka denoncuar ndërtuesin Arben Veliko, pronar i firmës Agri sh.p.k., pasi kishte paguar rreth 17 milionë lekë të vjetra si kapar për blerjen e një apartamenti 66 m² me çmim 450 euro/m².
Më vonë rezultoi se apartamenti ishte shitur dy herë. Çështja përfundoi në gjykatë dhe në korrik 2016 u vendos që ndërtuesi t’i kthejë shumën e paguar qytetares.
Megjithatë, zonja Shabani ende nuk i ka marrë paratë.
Sipas përmbaruesit Krenar Kapllani, edhe pse vendimi mund të ekzekutohet, pasuritë e ndërtuesit janë të gjitha të bllokuara nga përmbarues të tjerë për shkak të detyrimeve që ai ka ndaj qytetarëve të tjerë.
Ndërkohë, vetë ndërtuesi Arben Veliko deklaron se çështja është mbyllur me gjykatë dhe se qytetarja mund t’i marrë paratë përmes procedurave ligjore.
Gazetarja: Kam ardhur për një zonjë me emrin Merjeme Shabani, përsa i përket disa lekëve, që keni për t’i dhënë.
Veliko: Ato janë me gjyq. Ka mbaruar gjyqi.
Gazetarja: Po zonja s’po i merr dot, se ju s’keni asnjë pasuri.
Veliko: T’i marrë zonja, mos më hidhte në gjyq!
Gazetarja: Po pse, ju i keni premtuar, që do ia jepni?
Veliko: Po, patjetër! Të më kthejë hyrjen, t’i ktheja shtëpitë!
Gazetarja: Më fal një sekondë, cfarë hyrje t’i kthesh, të të kthejë?
Veliko: Hyrjen, që pati marrë.
Gazetarja: Po ajo hyrjen s’e mori, se ti e kishe shitur dy herë, apo jo?
Veliko: Jo, jo, nuk e kam shitur asnjë herë unë atë.
Gazetarja: Po ajo ka fituar vendimin e gjykatës.
Veliko: Po, e ka fituar vendimin e gjyqit.
Gazetarja: Që do të thotë, se ajo nuk e ka marrë apartamentin, se apartamenti ishte shitur dy herë.
Veliko: Nuk është shitur apartamenti as edhe një herë.
Gazetarja: Kush e ka apartamentin?
Veliko: Është shitur apartamenti.
Gazetarja: Pra, dalim, që zonja nuk ka as apartamentin, as paratë, apo jo?
Veliko: Po, po duhet të më kthejë lekët ajo mua!
Gazetarja: Cilat lekë, o zotëri?
Veliko: Lekët, që i kam dhënë.
Gazetarja: Çfarë lekësh i ke dhënë?
Veliko: Moj, apartamentin, a ia dhashë unë?
Gazetarja: Mos po ngatërron gjë zonjën…?
Veliko: Më fal!
Gazetarja: Ajo s’ka as apartamentin, as paratë.
Veliko: Nuk më intereson fare! Ka fituar gjyqin, le t’i marrë! Ka vendim gjykate, ka zyrë përmbarimi. I ka bërë të gjitha ajo.
Gazetarja: S’ka pasuri.
Veliko: S’kam, nuk kam! Nuk kam, vëlla!
Gazetarja: Fatkeqësisht në këtë shtetin tonë, ju keni vepruar shumë mirë, që s’keni asnjë pasuri, tashmë të deklaruar, apo të pabllokuar.
Veliko: Kam unë pasuri sa të duash, po për atë s’kam.
Gazetarja: I ke të bllokuara.
Veliko: Po, i kam të bllokuara.
Gazetarja: Për shkak të gabimit tuaj, që e keni shitur hyrjen dy herë.
Veliko: Nuk kam shitur unë 20 hyrje, unë kam 500 hyrje.
Gazetarja: Hyrjen e zonjës, e keni shitur dy herë, apo jo?
Veliko: Moj, nuk e kam shitur dy herë unë hyrjen.
Gazetarja: Po kush e ka shitur?
Veliko: Moj, hyrja deri para ca kohësh ishte. Ajo e braktisi hyrjen. Unë ia kam dhënë hyrjen për 25 vjet. I kam bërë nder asaj./tvklan.al
