Dëshmitari Ahmet Abedini, babai i Erisjano Abedinit dhe vëllai i Bujar Abedinit, të dy të akuzuar nga SPAK për vrasjen e biznesmenit Çajup Selimi, dha dëshminë e tij në gjyq, lidhur me ngjarjen.
Ai pranoi se kishte pasur konflikte me të ndjerin, duke pretenduar se Çajup Selimi i bënte telefonata anonime gruas së tij, në çdo orë të ditës dhe të natës. Sipas tij, për këtë çështje kishin bërë një padi në gjykatë dhe kishin arritur një marrëveshje që konflikti të ndalej.
Ahmet Abedini tregoi se në ditën e ngjarjes ai ishte në punë dhe më pas kishte shkuar në Gjirokastër për të shtruar nënën në spital. Ai tha se kishte dy dyqane materiali ndërtimi, njëri punonte ai dhe tjetri gruaja e tij. Konfliktet me Çajupin lidhnin kryesisht me telefonatat e përsëritura që ky i fundit i bënte nuses së tij dhe disa grindje fizike mes djalit të Ahmetit dhe Çajupit.
“Atë ditë kam qenë në punë, pasdite kam ikur në Gjirokastër, kisha shtruar nënën në spital. Kishim të njëjtin aktivitet tregtar, shisnim materiale ndërtimi. Unë kam dy dyqane. Një punoj unë, një e punonte gruaja. Kam pasur konflikte me Çajupin se i bënte telefonata nuses time, anonime, në çdo orë të ditës apo të natës. Kemi pasur konflikte edhe me fjalë edhe nja dy herë është rrahur me djalin, Elisjanon. I binte telefonit, pa pushim, kisha dy vjet që e kisha marrë. I thamë mos i bjer telefonit. Vajtëm edhe në gjykatë, për këtë punë. I kishte bërë nusja padi. Kishte 5-6 muaj që kishin bërë marrëveshje me policinë që nuk do kishin konflikte”, rrëfen ai.
Ai theksoi se ishte i bindur që telefonatat i bënte vetë Çajup Selimi, të cilat herë-herë nuk ishin anonime dhe gjithmonë e shqetësonin gruan e tij. Sipas tij, vëllai i tij nuk ishte në dijeni të këtyre telefonatave.
“Dua t’i bëj telefonatat, thoshte ai. Bashkëshortes i binte telefoni, në çdo orë të ditës. Ndonjëherë edhe jo anonime. I dërgonte mesazhe. E ngacmonte bashkëshorten. Ajo i thoshte mos i bjer më telefonit. Nuk i përgjigjej”, tregon dëshmitari.
Ahmet Abedini tregoi gjithashtu se si mësoi për vrasjen e Çajup Selimit. Ai tha se e mori vesh pas mesnate dhe shkuar në komisariat, ku mori konfirmimin për ngjarjen. Ai shtoi se nuk kishte pasur kontakt me Bujarin për disa ditë dhe se Erisjano ishte në Tiranë në momentin e ngjarjes, duke bërë që familja të mos marrë pjesë në varrim për shkak të kërkesave të policisë.
“Vëllai nuk ka qenë në dijeni të telefonatave që i bënte bashkëshortes. Asnjë nga vëllezërit nuk e dinte. Nga ora 12.00 i natës e mora vesh që ishte vrarë Çajupi. Vajta në komisariat, më thanë ata hajde, i pyeta ata unë 10 herë çfarë keni, nuk më thanë. Në komisariat më thanë që ishte vrarë. I thashë që kam qenë rrugëve, kisha çuar nënën në spital. Bujarin mund të kisha 10 ditë pa e takuar. Nëna rrinte me Bujarin, por e shoqëroja unë në spital se ai kishte bagëti, ishte çoban. Erisjano ishte në Tiranë, erdhi pas nja 3-4 ditësh. Atë natë e kërkoi policia, por pastaj folën me telefonin e nuses që Erisjano ishte në Tiranë. Nuk shkuam në varrimin e tij se isha në polici”, tha dëshmitari.
