Kryetari i Partisë Demokratike, Sali Berisha akuzoi kryeministrin Edi Rama për editorialin e përbashkët e Aleksandër Vuçiç për zgjerimin e BE-së, se po tenton që të devijojë orientimin 33-vjeçar të shqiptarëve drejt Evropës.
Në mbledhjen e Grupit Parlamentar të PD-së, kryedemokrati u shpreh se Rama e bën këtë gjënë për shkak se, sipas tij, është vënë me shpatulla pas muri, për shkak të dosjeve në ngarkim të tij dhe familjarëve të tij.
Berisha e cilësoi “bashkëpunimin” me Vuçiç si një tjetër akt tradhëtie ndaj Kosovës, ndërsa shtoi se vendi ndodhet në kohë kritike duke akuzuar se Rama po tenton të devijojë rrugën evropiane që kërkojnë qytetarët.
“Hyjmë në një stad të ri veprimi kundër shqiptarëve i regjimit të Ramës. Jo vetëm veten e nxjerr mbi ligjin por tani devijon edhe orientimin kryesor 33-vjeçar të shqiptarëve drejt Evropës.
E bën këtë pa pyetur asnjë njeri. Kjo dëshmon se jemi në kohë kritike për vendin, por edhe më të vendosur se kurrë që qytetarët t’i dalin zot vetes.”, u shpreh mes të tjerash Berisha.
