Deputeti demokrat, Edi Paloka, ka komentuar shkarkimin nga detyra të Elisa Spiropalit dhe fjalimin e mbajtur nga kjo e fundit, në lidhje me largimin nga kabineti qeveritar.
Në një postim në rrjete sociale, Paloka shkruan se fjalimi i Spiropalit i cili u cilësua si goditje për Ballukun, në fakt, sipas tij, ishte thumb për vetë Edi Ramën.
Sipas Palokës, Spiropali për herë të parë ka goditur direkt Ramën dhe duke e njohur mirë e ka goditur pikërisht tek ato pika ku Rama sheh “forcën” e tij duke i treguar se në fakt ato janë dobësia e tij.
Sipas Palokës, qëllimi i mesazhit të Spiropalit ishte t’ja thoshte disa gjëra në mënyrë indirekte, ish-idhullit të saj.
“Lexoja komentet që i ishin bërë reagimit të Spiropalit sot. Të gjithë e interpretonin si “goditje” apo “thumba” për Ballukun. Në fakt për herë të parë Elisa ka goditur direkt Ramën dhe duke e njohur mirë e ka goditur pikërisht tek ato pika ku Rama sheh “forcën” e tij duke i treguar se në fakt ato janë dobësia e tij…
I thotë që nuk është se nuk do jetë ndonjeherë burrështetas sepse nuk ndërton mbi parime po mbi kalkulime afatshkurtra…
I thotë se historia e një politikani nuk matet me kohëzgjatje mandati por me gjurmën që lë në kulturën politike dhe morale të vendit…
E mbi të gjitha, dobësia më e madhe e Ramës, ëndrra që të hyjë në histori, merr këtë koment nga Elisa: “Në histori figurat që mbeten nuk janë ato që mbajnë më gjatë pushtetin, por ato që nuk relativizojnë kurrë karakterin, sepse dinjiteti nuk është dekoratë ceremoniale…”
Këto fjalë i janë drejtuar vetëm Ramës , njeriut më pa karakter e dinjitet që ka njohur politika shqiptare.
Sigurisht kjo nuk e rehabiliton historinë e vetë Elisës në shërbim të Ramës, po të paktën ndryshe nga disa “burra” që kanë shkuar dhe në burg me gojën kycur, kjo ka vendosur t’ja thotë ca gjëra ish-idhullit”,- shkruan Paloka në fb.
