Kryeministri Edi Rama ka shkarkuar nga detyra zëvendëskryeministren dhe ministren e Infrastrukturës dhe Energjisë, Belinda Balluku, e cila është nën hetim nga Struktura e Posaçme Kundër Korrupsionit dhe Krimit të Organizuar (SPAK) për akuza që lidhen me korrupsion dhe abuzim me tendera.
Pas këtij vendimi, Balluku nuk do të mbajë më asnjë nga dy postet qeveritare. Më herët, Gjykata Kushtetuese e Shqipërisë la në fuqi vendimin për shkarkimin e saj nga detyra e ministres së Infrastrukturës dhe Energjisë.
“Tërmeti” në qeveri
Sipas informacioneve, vendin e saj pritet ta marrë Albana Koçiu, të cilën do e zëvendësojë Besfort Lamallari.
Në krye të Ministrisë së Energjitikës vendoset Enea Karakaçi.
Gjithashtu raportohet se Rama ka vendosur të shkarkojë edhe ministra të tjerë të kabinetit të tij.
Te Ministria për Evropën dhe Punët e Jashtme largohet Elisa Spiropali dhe vendoset Ferit Hoxha, ndërsa Erjona Ismaili merr detyrën e ministres për Marrëdhëniet me Parlamentin.
Gjithashtu edhe Pirro Vengu është larguar nga Ministria e Mbrojtjes, ndërsa detyrën e tij do ta marrë Ermal Nufi.
Hetimi i SPAK dhe çështja e arrestimit
Belinda Balluku është vënë nën hetim nga Struktura e Posaçme Kundër Korrupsionit dhe Krimit të Organizuar për dyshime që lidhen me procedurat e prokurimit publik në Tunelin e Llogarasë dhe disa lote të Unazës së Madhe.
Më 16 dhjetor të vitit të kaluar, SPAK i kërkoi zyrtarisht Kuvendit dhënien e autorizimit për arrestimin e Belinda Ballukut, e akuzuar për shkelje të barazisë së pjesëmarrësve në tendera në nëntë raste.
Partia Socialiste e Shqipërisë e shtyu në kohë vendimmarrjen në mbledhjen e Këshillit të Mandateve dhe Imuniteteve në pritje të vendimit të Gjykatës Kushtetuese, e cila la në fuqi vendimin për pezullimin e saj.
Ndërkohë, seanca për dhënien ose jo të autorizimit për arrestimin e Ballukut pritet të merret në ditët në vijim.
