Kryeministri i Izraelit, Benjamin Netanyahu, ka paralajmëruar Iranin se çdo sulm ndaj Izraelit do të marrë një përgjigje të ashpër.
Gjatë një konference të shërbimit të inteligjencës Shin Bet, Netanyahu deklaroi se i ka bërë të qartë Teheranit se Izraeli do të reagojë me “fuqi të papërfytyrueshme” në rast agresioni.
“U kam thënë iranianëve se nëse na sulmojnë, do të përgjigjemi me fuqi të papërfytyrueshme”, u shpreh ai.
Netanyahu bëri të ditur se Izraeli po punon për krijimin e një aleance rajonale për t’u përballur me ndikimin e Iranit dhe të Vëllazërisë Myslimane në Lindjen e Mesme.
Sipas tij, kjo nismë përfshin disa vende të rajonit, ndërsa theksoi se po zhvillohen vizita të ndërsjella për forcimin e bashkëpunimit.
Kryeministri kujtoi gjithashtu strategjinë e viteve ’50 dhe ’60, kur Izraeli kishte krijuar bashkëpunime me shtete jo-arabe në rajon, përfshirë Turqinë, Persinë (Iranin e atëhershëm), Etiopinë dhe komunitetin kurd.
Duke iu referuar situatës në Rripin e Gazës, Netanyahu theksoi se Hamas duhet të çarmatoset.
“Do të ndodhë me mënyrën e lehtë ose me atë të vështirë, por do të ndodhë”, deklaroi ai, duke nënvizuar se Izraeli nuk do të heqë dorë nga objektivat e tij të sigurisë.
Netanyahu u ndal edhe te rritja e vrasjeve në komunitetet arabe brenda Izraelit, duke theksuar nevojën për konfiskimin e armëve të paligjshme.
“Rezerva e armëve duhet të pakësohet dhe të sekuestrohet, sepse një ditë stuhi mund të vijë”, tha ai, duke lënë të kuptohet se armët e paligjshme përbëjnë rrezik për sigurinë e brendshme.
