Gjykata e Posaçme Kundër Korrupsionit dhe Krimit të Organizuar ka shpallur fajtorë dy ish-inspektorë të IMT-së, Klajdi Zhilla dhe Geraldo Fuçija, të akuzuar për korrupsion pasiv.
Sipas vendimit, të dy u dënuan fillimisht me nga 3 vite burg. Por për shkak se çështja u gjykua me procedurë të shkurtuar, dënimi iu ul me një të tretën, duke u caktuar përfundimisht në 2 vite burg secili.
Megjithatë, Gjykata vendosi pezullimin e dënimit me burg. Kjo do të thotë se ata nuk do ta vuajnë dënimin në qeli, por do të jenë në periudhë prove për 2 vite.
Gjatë kësaj kohe, nuk duhet të kryejnë asnjë vepër tjetër penale dhe duhet të paraqiten rregullisht pranë Shërbimit të Provës.
Po ashtu, ndaj tyre është vendosur edhe masa plotësuese “heqja e së drejtës për të ushtruar funksione publike” për 5 vite.
Hetimet për këtë rast nisën nga Policia e Tiranës dhe më pas u referuan pranë SPAK, pasi një qytetar, pronar i një lokali, ka kallëzuar inspektorët duke i akuzuar se i kishin kërkuar 1,000 euro ryshfet për një tendë të vendosur pa leje.
