Të krishterët nisin nesër Kreshmën e Madhe të Pashkës. Me këtë rast, Kryepiskopi i Tiranës, Durrësit dhe i Gjithë Shqipërisë, Joani, ka përcjellë një mesazh për besimtarët përmes një postimi në rrjetet sociale.
Në mesazhin e tij, ai thekson se Kreshma është një periudhë reflektimi dhe një “udhëtim drejt Zotit”, që synon ripërtëritjen shpirtërore dhe rikthimin te kuptimi i vërtetë i jetës.
Kryepiskopi nënvizon se kjo periudhë kërkon sakrificë, vetëpërmbajtje dhe pendim të sinqertë.
“Jeta jonë është një udhëtim drejt Zotit. Koha e udhëtimit është tani. Gjithsekush që pendohet, përfitimi është për të”, shprehet Kryepiskopi Joan në mesazhin e tij.
“Themi vazhdimisht që kreshma është një udhëtim. Jo vetëm kreshma, por vetë jeta jonë është një udhëtim. Të gjithë ne që kemi filluar kreshmën, kemi filluar një udhëtim. Filloi periudha që ndryshon ngjyrat. Zoti na tregon shpesh nëpërmjet Ungjillit për gjendjen në të cilën ndodhemi. Jo vetëm Zoti, por edhe shumë filozofë e psikologë thonë që njerëzit kanë humbur “veten” e tyre, dhe kush humbet veten, ka humbur gjithçka. Gjithçka tjetër që përpiqet të fitojë njeriu, nuk mund ta përmbushë dot atë që mund t’i japë “vetja”. Një nga arsyet që njeriu mendon se e ka humbur “veten” është kur nuk e kupton dot që e ka humbur “veten”. Keni dëgjuar të thuhet tek paravolia e “Djalit plangprishës” për djalin që u kthye që “erdhi në vete” (Lk.15:17). Kjo do të thotë se ai filloi të kuptojë situatën në të cilën ndodhej. Askush nuk mund të fillojë dot udhëtimin e kreshmës, nëse nuk do të vijë në vete. Ne sot e kemi humbur qëllimin e jetës. Dëshira për kënaqësi, etja për pushtet dhe të tjera gjëra të kota si këto nuk mund ta ndihmojnë njeriun jo vetëm që t’i japë kuptimin jetës, por as nuk do ta bëjnë dot të lumtur. Lumturia dhe qëllimi i jetës janë të lidhura me njëra – tjetrën.”, shkruan ndër të tjera
