Deputeti i PS-së, Erion Braçe, ka paralajmëruar kallëzim penal për institucionet që nuk i kanë kthyer përgjigje brenda afateve ligjore për kërkesat për informacion.
Ai shtoi se ka paraqitur një seri kërkesash për marrje informacioni pranë institucioneve si Tatimet dhe AKU, por sipas tij çdo afat është ezauruar pa marrë përgjigje.
Gjithashtu në fjalën e tij në Kuvend, Braçe tha se më 2 shkurt ka depozituar kërkesë për zhvillimin e një seance pyetje-përgjigje me ministren e Arsimit, por deri tani ajo nuk është zhvilluar.
Sipas tij, javës që vjen është “javë e gjelbër” dhe kanë kaluar më shumë se katër javë nga paraqitja e kërkesës, ndërkohë që Rregullorja e Kuvendit parashikon një afat maksimal prej tre javësh.
“Shoh që ministrja është këtu dhe kuptoj që është problem i Parlamentit. Shkolla ‘Edit Durham’, edhe pse është mbaruar, nuk është në funksion.
Shpërdorohet koha për çështje jashtë rendit të ditës dhe për çështje të rëndësishme koha është me racion.
Afati maksimal që ma jep Rregullorja është 3 javë, jo 4. 1700 nxënës shkojnë automatikisht në turnin e dytë. Kontrolli parlamentar nuk përdoret dot me racion”
Është ezauruar çdo afat me Tatimet dhe AKU, do shkojmë drejt një kallëzimi penal për të marrë informacion, u shpreh Braçe.
