Ish‑princi Andrew Mountbatten‑Windsor është arrestuar në Mbretërinë e Bashkuar në kuadër të hetimeve lidhur me dokumentet e publikuara të Jeffrey Epstein.
Arrestimi i tij është kryer nga Thames Valley Police dhe sipas raportimeve ai ndodhet ende i paraburgosur.
Në një deklaratë zyrtare, Charles III u shpreh “me shqetësim të thellë” për lajmin e arrestimit të vëllait të tij dhe theksoi se ligji duhet të ndjekë rrugën e tij.
Mbreti tha se procesi i hetimit do të zhvillohet në mënyrën e duhur nga autoritetet kompetente dhe se familja mbretërore do të vazhdojë detyrën e saj normale ndërsa çështja ndiqet sipas procedurave ligjore.
Deklarata e plotë
Kam mësuar me shqetësim të thellë lajmet rreth Andrew Mountbatten-Windsor dhe dyshimet për keqmenaxhim në detyrën publike.
Tani do të ndiqet një proces i plotë, i drejtë dhe i duhur, për të cilin çështja do të hetohet në mënyrën e përshtatshme dhe nga autoritetet kompetente.
Siç kam thënë më parë, ata kanë mbështetjen dhe bashkëpunimin tonë të plotë dhe të sinqertë.
Le të bëj të qartë: ligji duhet të ndjekë rrugën e tij.
Ndërsa ky proces vazhdon, nuk do të ishte e drejtë të shpreh koment të mëtejshëm mbi këtë çështje.
Ndërkohë, familja ime dhe unë do të vazhdojmë detyrën dhe shërbimin tonë për ju të gjithë.
Charles R.
Ndërkohë kryeministri Keir Starmer ka deklaruar se “askush nuk është mbi ligjin” dhe ka theksuar se ky parim duhet të zbatohet në këtë rast po ashtu si në çdo tjetër. Ai ka nënvizuar se të gjithë individët që kanë informacion të rëndësishëm duhet të dalin përpara autoriteteve për të ndihmuar hetimin, pa marrë parasysh statusin apo pozicionin e tyre.
Starmer shtoi se vendimi për të hetuar dhe ndjekur penalisht një individ është çështje që i takon policisë dhe autoriteteve kompetente, dhe se sistemi ligjor britanik duhet të zbatohet në mënyrë të barabartë për të gjithë.
