Në Dhomat e Specializuara të Kosovës në Hagë po zhvillohet seanca e fundit e deklaratave përmbyllëse në gjyqin ndaj katër ish-krerëve të UÇK: ish-presidentit Hashim Thaçi, ish-kryeparlamentarëve Kadri Veseli dhe Jakup Krasniqi, dhe ish-deputetit Rexhep Selimi.
Pas pushimit të drekës, secili nga të katërtit do të ketë të drejtën të flasë përpara trupit gjykues për 20 minuta, duke prezantuar argumentet për mbrojtjen e tyre. Përpara tyre, në gjykatë foli edhe mbrojtësi i viktimave, Simon Lewis.
Sot në seancë është prezent edhe Glauk Konjufca, zëvendëskryeministër dhe ministër i Jashtëm i Kosovës, i cili vuri në dukje se gjykata ka vonuar gjykimin e të akuzuarve për më shumë se pesë vjet, duke e cilësuar procesin si të njëanshëm ndaj UÇK-së. Ai theksoi se lufta e UÇK-së ishte e drejtë, mbrojtëse dhe nuk kishte synuar popuj të tjerë, duke shtuar se shpreson që vendimi i trupit gjykues të reflektojë historinë dhe lavdinë e luftës çlirimtare.
Në seancë janë të pranishëm edhe familjarët e ish-krerëve të UÇK-së, ndërsa pas përfundimit të deklaratave përmbyllëse të mbrojtjes së Jakup Krasniqit nisën pyetjet e gjykatës dhe më pas të prokurorisë.
Të katër ish-eprorët e UÇK-së akuzohen për krime lufte dhe krime kundër njerëzimit, por të gjithë janë deklaruar të pafajshëm. Trupi gjykues ka afat tre muaj për të marrë vendimin ose për të kërkuar zgjatjen e tij.
Ky gjyq vjen një ditë pas 18-vjetorit të Pavarësisë së Kosovës, ku qytetarë dhe figura publike u mblodhën në Prishtinë për të shprehur solidaritet dhe kundërshtim ndaj kërkesës së Prokurorisë Speciale për dënimin e ish-krerëve të UÇK-së.
