Përfaqësues të Grupit Parlamentar të Partisë Demokratike, Gazment Bardhi, Jorida Tabaku dhe Albana Vokshi, kanë zhvilluar ditën e sotme takim me Misionin e Komisionit të Jashtëm të Parlamentit Europian.
Të pranishëm në takim ishin edhe kryetari i Komisionit, David McAllister, shoqëruar nga 8 eurodeputetë të Parlamentit Europian.
Gjatë fjalës së tij para të pranishmëve, Bardhi tha se Shqipëria ka bërë regres në luftën kundër korrupsionit dhe krimit të organizuar.
Po ashtu Bardhi tha se zgjedhjet në Shqipëri deformohen nga partia në pushtet e kryeministrit Edi Rama, gjë që sipas tij, sjell pasoja të rënda në funksionimin demokratik të institucioneve në vend.
Në takim sipas PD-së u prek gjithashtu edhe çështja e Belinda Ballukut, për të cilën përfaqësuesit demokratë thanë se po mbrohet nga qeveria e Edi Ramës, për të mos u përballur me drejtësinë.
“Deformimi i zgjedhjeve sjell pasoja të rënda në funksionimin demokratik të institucioneve në vend. Gjatë këtyre javëve Kryeministri Edi Rama ka ndërmarrë një fushatë pengimi dhe sulmi ndaj institucioneve të drejtësisë, duke synuar intimidimin e tyre dhe pengimin e hetimeve në raste konkrete.
Çështja “Balluku” dhe çështja “AKSHI” janë rastet më tipike sesi mazhoranca po synon të pengojë drejtësinë, për të mbrojtur zyrtarët e korruptuar apo familjarët e Kryeministrit të përfshirë në përfitime të paligjshme të fondeve publike.
Propozimet ligjore për t’i dhënë më shumë imunitet zyrtarëve të korruptuar shkojnë në të kundër të kërkesës së BE për luftë pa kompromis ndaj korrupsionit dhe pandëshkueshmërisë” – u shpreh Bardhi në takim.
