Banorët e rrugës “Isuf Ferra” në qytetin bregdetar vazhdojnë të kundërshtojnë vlerat e shpronësimit për projektin e unazës, që prek pronat e tyre, duke kërkuar dëmshpërblim sipas tregut ose sistemim nga bashkia, pasi thonë se shumat e ofruara nuk u sigurojnë një banesë tjetër.
“Kam 50 vjet që rri në këtë shtëpi, çdo gjë e kam bërë vetë. Na kanë vendosur vlerën 40 milionë lekë. A ble dot shtëpi sot në Durrës me 40 milionë lekë? As një garazh nuk bën aq”, tha Sami Dashi, banor i lagjes nr. 8, për Median Amfora.
Banorët e kësaj zone organizuan një protestë më 13 shkurt, duke kundërshtuar vlerësimin e bërë nga bashkia për pronat e tyre.
“Shteti të bëjë çfarë të dojë, por mua të më sigurojë shtëpinë. Me aq lekë sa e vlerëson shteti, ku do gjej shtëpi unë?”, tha Ali Dardheca, një banor tjetër i zonës.
Projekti parashikon lidhjen e rrugës “Aleksandër Goga” me zonën e Currilave, përmes disa akseve ekzistuese në Spitallë dhe pranë Spitalit Rajonal, duke krijuar një lidhje të re mes qendrës urbane dhe zonës turistike të qytetit.
Projekti “Lidhja e Currilave me rrugën ‘Aleksandër Goga’” ka një vlerë rreth 1 miliard lekë të reja, financohet nga Qeveria Shqiptare dhe zbatohet nga Fondi Shqiptar i Zhvillimit, ndërsa punimet në terren realizohen nga kompania “Geci sh.p.k.” dhe parashikohen të përfundojnë brenda 24 muajve.
Këshilli Bashkiak i Durrësit miratoi më 10 shkurt në parim vlerën financiare të shpronësimit prej 867,7 milionë lekësh për pasuritë private që preken nga projekti “Lidhja e Currilave me rrugën ‘Aleksandër Goga’”. Tre ditë pas këtij vendimi, banorët dolën në protestë duke kundërshtuar vlerësimin, ndërsa thanë se nuk janë konsultuar siç duhet dhe kanë paqartësi rreth procesit.
“Mua s’më kanë thënë asgjë, se nuk ka ardhur njeri të më thotë gjë. Thonë vetëm do të prish shtëpinë, kaq”, pohoi Ali Dardheca.
Edhe banorë të tjerë thonë se po përballen me paqartësi dhe mungesë informacioni për procesin e shpronësimit.
“Njoftimi thoshte që do t’ju prishet, as nga bashkia, as nga kryetarët e zonës, ku janë këta deputetët? Deputetët nuk vijnë. Vetëm për votat vijnë? Duhet të kesh njoftim”, tha Sami Dashi.
Punimet për unazën po zhvillohen pa monitorim të dokumentuar arkeologjik gjatë ndërhyrjeve në terren.
Zona ku kalon projekti përfshin shtresa të qytetit antik të Dyrrahut, ku gërmimet e kryera në vitet 2000 – 2005 kanë zbuluar struktura nga periudhat ilire dhe romake.
Nga ana tjetër, tenderi për këtë projekt është shënuar me “flamur të kuq” në databazën e “Open Data Albania”, një platformë që monitoron prokurimet publike, pasi në procedurë u skualifikuan të gjithë operatorët konkurrues përveç fituesit, i cili nuk kishte ofertën më të ulët.
Banorët u shprehën të vendosur për të vijuar kërkesat e tyre, duke kërkuar rishikim të vlerave të shpronësimit dhe zgjidhje për strehimin./Amfora.al
