Bashkimi Evropian ka paralajmëruar se do të vijojë me paketën e 20-të të sanksioneve ndaj Rusisë, edhe nëse vendet e G7 nuk arrijnë një marrëveshje të përbashkët për masa të reja kundër Moskës.
Deklarata u bë nga Komisioneri Evropian për Ekonominë, Valdis Dombrovskis, pas takimit të ministrave të financave në Bruksel. Ai theksoi se koordinimi me partnerët e G7 është i dëshirueshëm, por nuk është kusht i domosdoshëm për të ecur përpara.
“Sa më i lartë të jetë përafrimi që mund të arrijmë, përfshirë nivelin e G7-ës, aq më mirë. Por ne nuk do të hezitojmë të ndërmarrim hapa edhe vetëm në nivelin e BE-së, nëse marrëveshja më e gjerë nuk arrihet”, u shpreh ai.
Çfarë parashikon masa e re?
Një nga propozimet kryesore është ndalimi i plotë i shërbimeve detare për tankerët rusë të naftës. Nëse kjo masë miratohet, do të përfundojë brenda juridiksionit të BE-së edhe zbatimi i tavanit të çmimit për naftën ruse, i vendosur nga G7 në dhjetor 2022.
Aktualisht, kufiri i çmimit për naftën ruse është rregulluar në 44.10 dollarë për fuçi. Me ndalimin e plotë të shërbimeve detare, kompanitë e BE-së nuk do të lejohen të ofrojnë shërbime për cisternat ruse, pavarësisht çmimit me të cilin shitet nafta.
Brukseli synon që paketa e re të miratohet deri më 24 shkurt, kur bëhen katër vjet nga nisja e pushtimit në shkallë të plotë të Ukrainës nga Rusia.
Ndryshe nga qëndrimet e mëparshme të Komisionit Evropian, që e lidhte këtë hap me një vendim të përbashkët në nivelin e G7, deklaratat e fundit tregojnë një ton më të vendosur për të vepruar edhe në mënyrë të njëanshme, nëse nuk arrihet konsensus më i gjerë mes aleatëve.
