Politologu Ermal Hasimja, një nga nismëtarët e Forumit për Dialog Politik, tregoi sot edhe për bisedimet e mbajtura në tryezën e Forumit për Dialogun Politik të opozitës, i mbajtur pak ditë më parë.
Ai tregoi për News24 se qëllimi i tryezës është gjithëpërfshirja, rrahja e tematikave dhe diskutime për të arritur me një qëndrim të përbashkët
Hasimja e cilësoi një zhvillim shumë pozitiv, duke shtuar se PD kishte rënë dakord për disa pika në tryezën e parë dhe pikat kryesore janë mbrojtja e drejtësisë pa kushte dhe më tej protestat e vazhdueshme opozitare, duke nisur nga ajo e 20 shkurtit.
“Është një proces për t’i bashkuar. Tani jemi në një moment urgjent, duke marrë parasysh se qeveria kërkon të ndryshojë nenin 242 të Kodit të Procedurës Penale. Partitë në tryezë janë në mbështetje të drejtësisë. Do shkohet në Komisionin e Reformës Zgjedhore me një vendim të unifikuar për qëndrimin tonë, kështu është vendosur të paktën. Por edhe problematika të ndryshme, si rekomandimet e OSBE-ODIHR. Në fund edhe për protestat e vazhdueshme, duke nisur nga data 20 shkurt. Thirrje të gjithë qytetarëve, ajo datë ka peshë të madhe simbolike. Kërkohet unifikim i partive”, tha ai.
Sipas tij, partitë pjesëmarrëse në tryezë, përfshirë edhe PD-në, mbështetën një drejtësi kushtetuese që funksionon sipas standardeve perëndimore.
Një tjetër çështje e diskutuar ishte reforma zgjedhore, ku Hasimja theksoi se “në komisionin përkatës do të paraqitet një propozim i unifikuar për Kodin Zgjedhor”.
Ai bëri me dije se “kjo ishte vetëm tryeza e parë në kuadër të këtij angazhimi, dhe do të vijojë”.
Në përfundim, Hasimja foli edhe për thirrjen për protesta të vazhdueshme duke nisur nga data 20 shkurt, të cilën e cilësoi si një datë me peshë simbolike.
