Nga Boldnews.al
Teoritë e kota se kryeministri Edi Rama do të vihet në trysni ndërkombëtare nëse pengon drejtësinë, madje do rrezikojë edhe integrimin e vendit, po qarkullojnë ca si dendur. BE është e shqetësuar për qëndrimet e Ramës dhe qenieve të tjera politike, që mendojnë pa menduar fare për të penguar drejtësinë.
Në një situatë të tillë, Europa që ka të hapur kapituj dhe grup kapitujsh për negociatat si vend kandidat për në BE mund t’i japin Shqipërisë një karton të kuq për të qëndruar jashtë lojës së tyre për një kohë të pacaktuar. Por Rama e ka ndarë mendjen për të sfiduar këdo dhe kudo qofshin, në Tiranën zyrtare, Bruksel apo Uashington.
Kryeministrit nuk i plas koka për fare nëse pengohet ose jo integrimi. As ka qenë, as është dhe as nuk do të jetë prioritet, e aq më pak qëllim qenia e Shqipërisë një nga vendet e reja anëtare e BE-së. Gjithçka me çështje integrim është fabul boshe për trutë e boshta të militantëve. Kryetari i një qeverie që ka ardhur dhe mban pushtet me krim, oligarki dhe korrupsion nuk mund të tërhiqet nga asnjëlloj presioni, qoftë edh ai ndërkombëtar.
Këta të fundit ditët e fundit po shprehin shqetësim për “çedim të demokracisë” në Shqipëri dhe veçanërisht nga ndërhyrja e pushtetit ekzekutiv dhe legjislativ në sistemin e drejtësisë, nëpërmjet shantazhit ose duke ua lidhur duart me ndryshime ligjore.
Nuk do t’ia dijë nëse fillimisht burokratë të nivelit të ulët e mesëm apo edhe të lartë më vonë, në gjuhën angleze do të “kërcënojnë” me bllokim negociatash, apo të lëshojnë rezoluta. Për Ramën qëllimi është mbajtja e pushtetit, pa u cënuar nga askush. Deviza e tij është mbajtja me çdo kusht dhe mjet e pushtetit.
Ai dhe 83 kartonët e tij, shtuar edhe tre nga PSD do vihen para faktit të kryer për ndryshimet në Kodin e Procedurës Penale, konkretisht për disa shtesa në nenin 242 të tij ku flitet për pezullimin nga detyra. Projekti Rama është i qartë. Me ligj synon t’i heqë Prokurorisë dhe Gjykatës Speciale të drejtën e pezullimit nga detyra të anëtarëve të kabinetit qeveritar dhe vetë atij. Kjo pritet të ndodhë, ndërsa të “shqetësuarit” në Bruksel dhe Uashington u zgjuan vonë, pasi krijuan një përbindësh me ambasadocët e tyre këtu në Shqipëri, tashmë u duket sikur shprehin çudi sesi “liberali Ramë” u kthye në autokratin e madh të një copë vendi në Ballkan.
