Pasi morën nën hetim deputetin e PD-së, Belind Këlliçi, për ngjarjet gjatë protestës, ndonëse ai ndodhej në një takim pune në SHBA, Policia e Shtetit është përpjekur të justifikohet.
Sipas zëdhënësit të Policisë së Tiranës, Gent Mullai, Këlliçi nuk është proceduar për dhunë ndaj efektivëve, por për organizimin e tubimit.
“ Nuk është lapsus, zoti Këlliçi nuk është proceduar për kundërshtim të punonjësve të policisë por për organizim të tubimit. Policia ka pasur informacionin e nevojshëm dhe janë referuar materialet në Prokurori Tiranë.
Pasi kanë mbaruar fjalimet te tubimi para kryeministrisë, kanë filluar aktet e dhunës. Policia është treguar e përmbajtur. I ka bërë thirrje që të distancohet nga aktet e dhunës.
Gazi lotsjellës është përdorur para parlamentit pasi sulmi ka qenë me intensitet të lartë para punonjësve të policisë.”, tha ai në News24.
