Në seancën e kësaj të marte në Gjykatën e Posaçme, Henrik Hoxha, i pandehur në dosjen e njohur si “Plumbi i artë”, ka dhënë dëshmi lidhur me atentatin e dështuar ndaj biznesmenit Lulëzim Masha.
Sipas Hoxhës, porosia fillestare e marrë nga Nuredin Dumani nuk kishte si objektiv Lulëzim Mashën, por djalin e tij. Ai deklaroi se nuk e mbante mend emrin e të riut, por se i ishte treguar fotoja, banesa dhe shkolla që ai frekuentonte.
Ai shtoi se djali i Mashës qëndronte kryesisht në Maqedoni, çka e vështirësonte lokalizimin e tij. Sipas dëshmisë, për këtë arsye u angazhua një person me nofkën “Sakati”, i cili do të jepte informacion në rast se i riu do të hynte në Shqipëri.
Dëshmia e Henrik Hoxhës: Unë kisha porosi nga Nuredin Dumani për djalin e Mashës, jo per Lulzimin.
Nuk e mbaj mend emrin e djalit, por Nuredini më tregoi një foto, më tregoi shtëpinë, shkollën.
Djalin nuk po e gjenim dot.
Njëri nga vëllezërit Dizdari ka qenë i fejuar me vajzën e Mashës. Dhëndri ka hedhur disa prona në emër të vjehrrit e kunatit. Dhëndri u nda nga vajza dhe këta nuk i kanë kthyer ato lekë a prona pas.
Ne nuk po e gjenim dot djalin e Mashës, se rrinte në Maqedoni.
Në fillim diskutuam për 150 mijë euro. Pastaj për Lulzim Mashën për 100 mijë euro.
Mbikëqyrja e Lulzimit zgjati gati 1 vit, se e lamë cikë pas dore ne. Djalin nuk e gjenim dot. Prandaj u angazhua Sakati, që do na jepte informacion nëse ai futej në Shqipëri.
Nuredini thoshte se djali i Mashës mashtronte njerëzit në Maqedoni.
Lulzim Mashës iu bë atentat më 18 janar më 2022 teksa po lëvizte me automjetin e tij tip “Mercedez Benz ML”, ku në drejtim të tij u qëllua me armë zjarri pistoletë.
Masha kishte vetëm pak minuta që ishte larguar nga ambientet e punës dhe krejt i vetëm po zbriste nga Kodrat e Liqenit Artificial. Në afërsi të nënkalimit të Liqenit të Thatë u qëllua me tre plumba.
