Shuma e nevojshme për riatdhesimin e trupave të familjes Kola, e cila u shua nga helmimi me monoksid karboni në provincën e Luccës në Itali, është mbledhur pak ditë pas ngjarjes së rëndë.
Sipas mediave të huaja, fushata e hapur në platformën GoFundMe ka arritur mbi 75 mijë euro, fonde që do të përdoren për shpenzimet funerale, transportimin e trupave drejt Shqipërisë dhe për mbështetjen e familjarëve të viktimave.
Apeli është hapur nga Durim Kola, vëllai i Artit Kola, i cili ka sqaruar se ceremonia mortore do të zhvillohet në Shqipëri, ndërsa fondet e mbetura do të ndahen për familjet e tyre.
Ngjarja e rëndë ndodhi disa ditë më parë në Porcari, ku humbën jetën Arti Kola (48 vjeç), bashkëshortja e tij Jonida (43 vjeç), djali Hadjar (22 vjeç) dhe vajza Xhesika (15 vjeç). Sipas të dhënave paraprake, shkaku i vdekjes ishte ekspozimi ndaj monoksidit të karbonit të lëshuar nga një kazan gazi i instaluar së fundmi në banesë.
Mediat italiane raportojnë se, në momentet e para të emergjencës, djali i madh i familjes kishte telefonuar shërbimet e urgjencës për të kërkuar ndihmë për motrën e tij, e cila kishte shfaqur e para shenja të helmimit. Për shkak se familja ishte zhvendosur së fundmi, adresa e komunikuar rezultoi e pasaktë, çka bëri që ambulanca të mos arrinte të lokalizonte menjëherë banesën. Pas disa minutash, telefoni celular nuk mori më përgjigje.
Banesa u gjet rreth një orë e gjysmë më vonë, pas ndërhyrjes së karabinierëve. Edhe Durim Kola, i cili mbërriti në vendngjarje së bashku me shërbimet e emergjencës, humbi ndjenjat për disa sekonda pasi hyri në shtëpi, për shkak të përqendrimit të lartë të monoksidit të karbonit.
Ndërkohë, Prokuroria e Luccës ka hapur një hetim për të rindërtuar dinamikën e plotë të ngjarjes dhe për të verifikuar përgjegjësitë e mundshme. Sipas informacioneve të deritanishme, kaldaja ishte e re dhe dyshohet se është instaluar nga vetë pronari i banesës. Rezultatet e analizave toksikologjike, të kryera nga mjeku ligjor Stefano Pierotti, priten gjatë ditës së sotme dhe pritet të sqarojnë përfundimisht shkaqet e vdekjes, duke bërë të mundur edhe shmangien e autopsive.
Pas përfundimit të procedurave ligjore, trupat e pajetë të katër anëtarëve të familjes Kola do të riatdhesohen në Shqipëri.
