Detaje të reja janë bërë publike lidhur me ngjarjen e rëndë që ndodhi në Itali, ku katër anëtarë të familjes Kola humbën jetën nga helmimi me monoksid karboni në banesën e tyre.
Ngjarja ka ndodhur mbrëmjen e së mërkurës në lagjen Rughi. Viktimat janë Arti Kola, 44 vjeç, me profesion bojaxhi, bashkëshortja e tij Jonida, 48 vjeçe, djali Hajdar, 22 vjeç, elektricist, dhe vajza e mitur Xhesika, 15 vjeçe.
Sipas raportimeve të mediave italiane, në orën 19:58, djali i familjes, Hajdari, ka telefonuar numrin e emergjencës 112 dhe është lidhur me shërbimin 118. Gjatë telefonatës, ai ka deklaruar se motra e tij nuk ndihej mirë. Telefonata ka zgjatur rreth 11 minuta, por gjatë komunikimit Hajdari ka humbur ndjenjat për shkak të helmimit.
Gjatë thirrjes, ai ka dhënë një adresë të pasaktë të banesës, 168 në vend të 186, gjë që ka shkaktuar vonesë në lokalizimin e saktë të shtëpisë nga shërbimet e emergjencës.
Ambulanca ka mbërritur në zonë rreth orës 20:03, por për shkak të adresës së gabuar nuk ka arritur të gjejë menjëherë banesën. Më pas janë përfshirë fqinjët dhe karabinierët për identifikimin e adresës së saktë. Ekipet e emergjencës kanë arritur te dera e banesës rreth orës 21:46.
Në tentativë për të hyrë në ambientet e brendshme, xhaxhai i familjes, Turim Kola, së bashku me dy karabinierë, janë ndjerë keq për shkak të mungesës së oksigjenit dhe janë nxjerrë jashtë për ndihmë mjekësore. Më pas kanë ndërhyrë zjarrfikësit, të cilët kanë siguruar banesën. Pas kontrollit, mjekët kanë konstatuar vdekjen e të katër anëtarëve të familjes.
Prokuroria ka bërë të ditur se hetimet janë në vijim. Kaldaja e banesës është sekuestruar dhe po verifikohet nëse instalimi dhe kontrolli i saj janë kryer në përputhje me rregullat ligjore, si dhe për të përcaktuar përgjegjësit për montimin. Banesa ishte blerë nga Arti Kola rreth tre vite më parë dhe familja kishte nisur të jetonte aty prej rreth 6–7 muajsh.
Ngjarja ka sjellë reagime në komunitetin e Porcarit, ku familja Kola jetonte. Autoritetet vendore kanë njoftuar anulimin e paradës së Karnavaleve, ndërsa në kishën “San Giusto” po zhvillohet një vigjilje përkujtimore. Në ambientet pranë banesës janë vendosur lule dhe mesazhe nga nxënës dhe bashkëmoshatarë të vajzës 15-vjeçare.
