Kryeministri Edi Rama, ka sulmuar sërish ditën e sotme gjyqtarët për çështjen e rritjes së pagave.
Në një lidhje live në rrjete sociale, Rama ka përmendur reagimin e Shoqatës së Gjyqtarëve e cila u shpreh një ditë më parë se po ushtrohet presion dhe linçim publik ndaj GJK, ndërsa e ka cilësuar situatën si një tymnajë populiste.
Rama thotë se kjo është sipas tij një përpjekje e papranueshme për të imponuar përmes pushtetit gjyqësor, ndërsa ka propozuar me ironi që shoqata e gjyqtarëve të regjistrohet si parti politike dhe të shpalosin platformën e tyre.
“Jam këtu në një komunikim të drejtë për drejtë sepse jam absolutisht i surprizuar nga një reagim i pa besueshëm i shoqatës së gjyqtarëve në lidhje me shqetësimin për një përpjekje që në këndvështirimin tim është e pa pranueshme për t’ju imponuar Kuvendit e qeverisë përmes pushtetit gjyqësor dhe për t’i rritur pagat vetes gjyqtarët. S’mund të thuash topi është i imi, topin do ta gjuaj vetë dhe porta duhet të jetë bosh.Tymnajë populiste. Regjistrohuni si parti dhe shpalosni platformën tuaj nëse doni.”, tha mes të tjerash ai.
