Gara për drejtorin e Gardës së Republikës së Shqipërisë ka dështuar, duke mos finalizuar një fitues.
Në mesazhin dërguar kandidatëve thuhet se pas përfundimit të të gjitha fazave të parashikuara të verifikimit dhe vlerësimit të kandidaturave, procedura nuk është finalizuar me shpalljen e një kandidature fituese.
Ndërkohë, sipas raportimeve, një nga kandidatët që është vlerësuar nga komisioni më me shumë pikë, i mungon një nga kriteret ligjore për t’u shpallur fitues, siç është cikli i dytë i arsimit të lartë, dhe për këtë arsye gara nuk është finalizuar me fitues dhe pritet që të hapet garë sërish.
“Në vijim të procedurës së konkurrimit për përzgjedhjen e kandidatit për pozicionin e Drejtorit të Përgjithshëm të Gardës së Republikës, të zhvilluar në zbatim të Udhëzimit të Ministrit të Brendshëm nr. 102, datë 05.06.2024, ju informojmë se, pas përfundimit të të gjitha fazave të parashikuara të verifikimit dhe vlerësimit të kandidaturave, procedura nuk është finalizuar me shpalljen e një kandidature fituese,- thuhet në mesazh.
Hapja e garës për drejtorin e ri të Gardës së Republikës erdhi pas dorëheqjes së Ermal Onuzit vetëm 9 muaj pasi u emërua në këtë detyrë.
Në garë për Kreun e Gardës ishin: Arian Sopiqoti, Denis Deliu, Faik Basha, Ilirjan Hasanaj, Liman Hoxha, Simon Zereci, Vasil Çuni dhe Zaje Osma.
