Deputeti demokrat Luçiano Boçi deklaroi në Kuvend se Elbasani është qarku më i madh në vend për përdorimin e kokainës. Sipas tij, përdorimi i narkotikëve sjell pasoja dramatike për shoqërinë dhe nuk është pasojë e sistemit demokratik apo e trashëgimisë nga një sistem tjetër, por një plagë e krijuar nga qeverisja.
Boçi u shpreh se përdorimi i drogës është rritur ndjeshëm pas vitit 2013 dhe se sot narkotikët po konsumohen edhe nga shtresa shumë të reja, përfshirë moshat e paraadoleshencës. Ai tha se droga po shpërndahet edhe pranë shkollave, ndërsa mungon një raport i saktë për numrin real të përdoruesve.
Sipas deputetit të PD-së, paradoksalisht, në qarqet më të varfra të vendit ka më shumë përdorues droge, çka tregon për një problem serioz social dhe institucional. Ai ia atribuoi përgjegjësinë qeverisë, duke theksuar se shkaku kryesor është bashkëpunimi i saj me krimin e organizuar.
“Qeveria nuk i lufton bandat dhe trafikantët e drogës”, tha Boçi, duke shtuar se kjo situatë është denoncuar edhe nga partnerët ndërkombëtarë.
