Mali i Zi po përballet prej ditësh me një aferë serioze që ka përfshirë figura të larta shtetërore, në qendër të së cilës janë Mirjana Pajkoviç dhe Dejan Vukshiç, ish-drejtor i Agjencisë së Sigurisë Kombëtare dhe ish-këshilltar i Presidentit Jakov Milatoviç.
Skandali ka çuar në dorëheqjen e të dyve nga funksionet publike. Vukshiç dha dorëheqjen në fund të vitit të kaluar, ndërsa Pajkoviç u largua javën e kaluar nga detyra e drejtoreshës së Drejtorisë për Promovimin dhe Mbrojtjen e të Drejtave dhe Lirive të Njeriut në Ministrinë e të Drejtave të Njeriut dhe të Pakicave.
E ftuar në emisionin “Puls of Serbia Weekend”, Pajkoviç mohoi zërat për një skandal seksual, duke theksuar se rasti ka të bëjë me krim kibernetik dhe shkelje të të drejtave kushtetuese. Ajo deklaroi se dorëheqjen e ka dhënë si akt përgjegjësie personale, për të mos dëmtuar institucionin që përfaqësonte.
“Ky nuk është një skandal seksual, por një problem sigurie me natyrë dixhitale. Është një akt që cenon të drejtat e garantuara nga Kushtetuta dhe duhet të shqetësojë çdo qytetar,” deklaroi ajo.
Pajkoviç tha se për më shumë se një vit ka jetuar nën frikë dhe kërcënime, të cilat sipas saj vinin nga një zyrtar i lartë shtetëror.
“Është e papranueshme që një qytetar të jetojë me frikë nga pushteti i zyrtarëve. Ata duhet të na mbrojnë, jo të na kërcënojnë,” u shpreh Pajkoviç, duke shtuar se ka ngritur disa kallëzime penale dhe se rasti është bërë publik falë medias.
Ajo akuzoi Presidentin Jakov Milatoviç se ishte në dijeni të situatës, por nuk reagoi, duke shtuar se priste mbështetje institucionale dhe morale.
“Prisja mbështetje prej tij. Kërcënimet vinin nga zemra e zyrës së Presidentit. Fjalët ishin: ‘Nuk do të ketë jetë për ty në Mal të Zi’. Heshtja e tij më kompromenton,” tha ajo.
Në fund të intervistës, Pajkoviç pranoi se ka heshtur për një kohë të gjatë për dhunën që ka përjetuar, duke e quajtur këtë një gabim të rëndë.
“Ata që kërcënojnë sot, nesër mund ta bëjnë realitet. Nuk ndihem e sigurt dhe nuk e di çfarë mund të ndodhë,” – përfundoi ajo.
